Shillong, Lber 03: Mynta ka sngi 02 Lber 2026 u nongai ktien ka Meghalaya BJP State Unit u bah M. Kharkrang ha ka jingdonlang u bah AL Hek MLA la kren shai ba ka party kam don kano kano ka jingiadei bad u Sunil Deodhar bad kum ka party na ka ri baroh kawei kam shim ai ka jingkyrshan ia u.
U bah Kharkrang haba kren bad ki lad pathai khubor ha ophis treikam jong ka party ula ong ba ym lah ban len ia ka jingshisha ia ka jingnoh synniang jong ki khristan khamtam ha ka pule puthi ha kane ka jylla Meghalaya.
Ula kdew ba dei u Rev Thomas Jones uba la ai ia ki dak thoh khasi, bad ki seng niam bapher bapher kila sdang ia ki jaka ai jinghikai ha kylleng ki bynta jong ka jylla bad ki hikai ruh ia kaei kaba u trai Jisu u hikai ban ia ieit iwei iwei pat bad dei kane kaba la pynlong ia ka jylla Meghalaya ba kan long ka jylla kaba shngain ha ka ri baroh kawei.
Lada don mano mano ba kylli ia ka jingtreikam jong ki balang kane ka kren shai ia ka jingbiej bad ia kum kita ki briew dei ban pynrem, haba iadei bad ka jingkren jong u Deodhar na ka liang u president ka party bad ki arngut ki MLA kila iakren bad ki nongialam ka party ban pynpaw ia ka jingpyrshah ia ka jingkren laplah jong u, bad ka party kam don jingiadei eiei bad u.
