Sohra, Naitung 31: U Bah Teinwell Dkhar MDC jong ka Shella konstitwensi bad u ba dei ruh u Chief Executive Member jong ka KHADC, u la ong ba ka jingangnud kaba u Dr Donkupar Roy speaker jong ka iing dorbar thawain ka jylla bam kwai ha dwar u blei ka long ban pynioh ia ka South East Khasi Hills District ha Sohra.
Ha ka jingkren jong u Bah Teinwell Dkhar CEM jong ka KHADC ha ka jingleh burom khatduh ia u tei u nongialam, u la ong ba kum u nongmih khmat na katei ka thain ha kine ki 31 snem u Dr Donkupar u ka leh bun bah ki kam na ka bynta ka konstitwensi bad ia ka jylla.
Na ka liang jong u CEM jong ka KHADC u la kyntu ia ka sorkar ba kum ka dak jong ka jingburom ia une u nongialam ia kaba u khlem patlah ban pynurlong ia kaei kaba u ong ba, ba ka sorkar kan shim khia ban pynurlong ia kaei kaba u kwah ka tang ka long ba ka sorkar kan pyrkhat ban pynioh ia ka SEKH District, ha Sohra.
Ha kane ka jinialang pyndon burom kaba la long ha iing sah jong u Dr Donkupar , kiba la kren ki long na ki nongialam jong ka party UDP, u BG Momin, u Bah Metbah Lyngdoh, na u para khatduh jong u Dr Donkupar u Sainkupar, ia ka jingialang la pyniaid da u Bah T. Chyne MDC ka Sohra bad ia ka jinglehniam la pyndep da u Rev C Khongwir na ka balang Jaiaw.
Ha kane ka jingpyndon burom ia une u nongialam kiba la don lang ki long u myntri rangbah ka jylla u Conrad K Sangma, ki myntri sorkar, ki MLA na baroh ar liang kiba ha iing ha sem bad ki lok ki jor kiba la wan ban pyndon burom khatduh ia u Dr Donkupar Roy bam kwai ha dwar u blei.
