Shillong, Lber 18: Ka Federation of Khasi Jaintia and Garo People (FKJGP) ka la kyntu ia ka sorkar jylla ban wad ki lad ki lynti ban pyllait noh ka ram kaba la shim da ki nongrep, ka ban iarap ban weng ia ka jingeh ka jong ki.
Ka shithi ba la phah sha ka kong Ampareen Lyngdoh myntri ba khmih ka tnad kam rep kam riang ka Kong u president ka FKJGP Mawkynrew Circle u Shakanstar Mynsong ula pynpaw ba ki nongrep ka thain Mawkynrew bad Mawryngkneng Block ki la mad jingeh namar ka jingbymlah siew ia ka ram namar ka jingkylla ka suiñbneng ha kaba ki jingthung jingtep kila iap lud namarba duna slap.
Kumta ka seng ka kyntu ia ka sorkar jylla ban wadlad ban pyllait noh ia ka ram, ka ban iarap ia ka jingmat jingeh ki nongrep.
Ka seng FKJGP ka la pynpaw ruh ba ka jingbymioh sboh dawai bad ka jingbymlah ka tnad sorkar ban ai ki symbai bad ka jingslem ban pyllait ia ka jingiarap sha ki Producer Group (PG) wat hadien ba ki la rejistar la palat ka shi snem ka la ktah jur ia ki nongrep ha ka jylla.
Namar katei ka jingeh ka seng ka kyrpad jur ia ka tnad ban shimkhia mardor ban pynbeit ia kine ki jingeh la ong u bah Shakanstar Mynsong.
