Shillong,Lber 13: Ka party BJP jong ka Meghalaya State Unit mynta ka sngi ka leit ban ia kynduh ia u Lat ka jylla u C.H.Vijayashankar ban ia kren ha kaba ia dei bad ka elekshon MDC ha GHADC kaba la pynmih ia kaei kaba la jia ha kine ki sngi ha Garo Hills.
Kane ka jia baroh namar ka don ka jingbymiashai ha ka Assam and Meghalaya Autonomous District Council Rule of 1951, ia kane ka jingiakynduh la ialam da u president u Rikman G.Momin, bad u bah A.L. Hek state president bad kiwei ki nongkitkam ka party.
Ha kane ka jingiakynduh la ai ia ka dorkhas ha u Lat ka jylla bad la ai ia ka jingmut ban batai shai ia ka rule ba kan nym don kano kano ka jingialam bakla bad kata ka rule ka dei ban long ha ka liang jong ki trai shnong kane ka jylla Meghalaya kiba dei ki riewlum.
Ha kane ka dorkhas ka BJP kala ai jingmut haba wanrah ia ka jingpynkylla ia ka rule ba uno uno u ban iakhun ia ka elekshon ne ban thep vote u dei ban don ia ka sanot Schedule Tribe, ha kane ka jingiakynduh la kyntu ia u Lat ba un khot ia ka jingialang kaba kyrpang ban wanrah ia ka jingpynkylla ia ka rule.
Ha kane ka jingiakynduh u Lat ka jylla u la kular ia ki nongialam ka BJP da kaba shim ia kaei kaba la jia bad ia kane un sa phah sha ki riewstad ain ba un ioh ia ka jingshai bad hadien ba u la ioh ia ka jingpynshai un sa leh ia kaba donkam katkum ki kyndon kiba don ha ka riti synshar jong ka Ri India kane ka long katkum ka kyrwoh ba la phah da u Mariahom Kharkrang u nongaiktien ka BJP.
