Shillong, Risaw, 02: Ki nonghikai skul SSA kiba don haka lama Meghalaya SSA School Association (MSSASA) ba la ialam da u Bah Aristotle C. Rymbai kum u President kim kwah ia ka jingpynkiew tulop hynrei ki kwah ban shim noh ia ki na ka State Implementation Society (SIS) sha ka tnat Pule Puthi.
Ha kane ka sngi palat hajar ki nonghikai skul SSA kiba dei ki dkhot jong ka MSSASA kila iakynduh lang ha madan Students, Jaiaw, ban shim ia kane ka rai shwa ba ki nongialam ka seng kin sa leit ban aiti da ka jingthoh sha ka tnat Pule Puthi jong ka Sorkar Jylla ha kine ki khyndiat sngi ki ban sa wan.
Ha kane ka jingialang kila shim ia ka rai ban ai da ka jingthoh sha ka sorkar ban dawa ba dei ban shim noh ia ki nonghikai SSA sha ka tnad pule puthi, ia kane kin sa leit ban ai da ka jingthoh sha ka sorkar.
Ha ka jingiakren bad ki lad pathai khubor u Bah Rymbai u la ong, “hadien ka jingiakynduh jong ngi ha ka 10 tarik u bnai baladep ia u State Project Director (SPD) uba dei ruh u Director jong ka School Education and Literacy u Swapnil Tembe bad ha ka jingiakynduh ia u Commissioner and Secretary ka tnat Pule Puthi u Vijay Kumar Mantri ha ka 19 tarik u bnai ba ladep.
Ha kane ka jingiakynduh u bah Aristotle Rymbai u la kam ba ka tnat Pule Puthi ka la pynkhreh shaid shaid ka Cabinet Memorandum na ka bynta ban pynkynriah noh ia ki nonghikai skul SSA na ka State Implementation Society sha ka tnat Pule Puthi.
Halor ka jingdawa ban kyntiew ia ka tulop, u Bah Rymbai u la ong “ha ka jingiakynduh ia kine ki Ophisar ki la iathuh ba ka Sorkar kan ieh shwa ia ka jingpynkiew tulop hynrei kan iaid shakhmat ban pynkhreh ia ka Cabinet Memorandum ban kynthup noh ia ngi ki nonghikai skul SSA ha ka tnat Pule Puthi.”
U la iathuh ba ka MSSASA ka la pynsngew ia ki jingdawa naduh u snem 2019 bad bteng biang da ka jingiakhih ha u snem 2022. Ka jingiakynduh jong ki bad ka Sorkar ka la long kumba 22 sien kynthih, la iathuh u Bah Rymbai.
Ha kane ka jingialang mynta ka sngi kila ai por ia ka Sorkar ar bnai naduh ka ban sdang naduh ka sngi ba ngi leit buh ia ka dorkhas ba ka Sorkar kan pyndep ia ka jingpynkhreh da ka tnat Pule Puthi ia ka Cabinet Memorandum bad ban phah sha ka Kynhun Myntri ban ai ia ka jingmynjur, u la ong.
Hapdeng kine ki ar bnai, ngin sa leit ban iakynduh ia ki 12 ngut ki Myntri ka Sorkar Jylla kynthup ruh ia u Myntri Rangbah ka Jylla u Conrad K. Sangma ban pynsngew ia ka rai kaba ngi la shim mynta ka sngi ban kyrpad ia ki ba kin wanrah ia ka polisi ban pynskhem noh ia ka kam hikai skul hashwa ka 31 tarik, Lber, 2026 kumba ka Sorkar India ka ladep ai jingtip sha ki Sorkar Jylla ba kan ai jingkyrshan pisa haduh ka 31 tarik, Lber, 2026,” pyntip u Bah Rymbai.
“Lada ka Sorkar kam lah ban pynurlong ia ka jingdawa hapoh kine ki ar bnai, ngin sa pynbna da ka jingiakhih ia kaba ki nongshong shnong ka ri India kim pat ju iohi ia kaba ngi la pynkhreh mynta,” la iathuh shuh shuh u Bah Rymbai.
“Ngi la shim ia kane ka rai, namarba ha ki snem kiba ladep ngi ladep ban pynlong ia ki jingiakhih kiba khlem pud sngi bad kiwei kiwei. Ia mynta ngin ym pat pynbna ia kane ka sienjam hynrei ngin sa leh pat hadien ba la kut ki ar bnai (ki jingaipor),” ong u Bah Rymbai.
Haba kylli ia ka jingiaid lynti la kajong da ka All Meghalaya SSA School Teacher’s Association (AMSSASTA) u Bah Rymbai u la ong, “ha kano ka rukom ki leit iakren bad ka Sorkar ki kham tip bha ma ki kumno ban dawa ia ka jingkyntiew tulop kaba long shi spah na ka shi spah. Ia kane ka jingdawa jong ki ngim don eiei ban ong. Hynrei ia ka jingiaid lynti jong ngi kum ka MSSASA ngi ladep ban pynshai ia ki para nonghikai haba shit haba shai.”
