Shillong, Nailar 04: Ka KSU South West Khasi Hills District, KSU Lawbah Border Area Circle lem bad ka KSU Mawsynram Unit ki ai iaka jingkyrshan ba pura iaka rai jongka Durbar Shnong Mawsynram ban pyrshah iaka jingwan lehniam haka krem Mawjymbuin da kawei ka kynhun niam .
Ka KSU ha ka kyrwoh khubor ka la pynpaw ia kajuh ka jingmut bad ka ieng ha kajuh ka nongrim kumba ka shnong Mawsynram ka ieng bad ka seng ka long ruh kaba la kloi ban mih shakhmat lem bad ki nongshongshnong ka Mawsynram lada ka kam ka dawa ba ngi hap ban mih shakhmat.
Ka krem Mawjymbuin ka dei ka jaka jngoh kai pyrthei namar kata kum ka seng ngi don ka juh ka jingpyrshah ban pynkylla ia kane ka jaka jngohkai pyrthei kum ka jaka lehniam jong kano kano ka kynhun niam.
Ka seng ka maham ruh ia kita ki kynhun niam ba kim dei ban wan thombor ne pynlong jubor ia kum kita ki jinglehniam haba shnong Mawsynram ka pyrshah ia kata ka jingwan lehniam.
Ka jingthmu ban thombor ne pynlong jubor iaki jinglehniam ha katei ka jaka ka dei ka jingiuhroit iaka hok longtrai jongki trai jaka ha kaba ia kane ka seng kan nym lah ban pdiang lano lano ruh ne iano iano ban wan leh jubor iaki trai khyndew ne khlem da pyrkhat iaka jingsngew jong kiba bun ba lang ki nongshong shnong katei ka thain.
Ka krem Mawjymbuin ka dei ka jaka jngohkai pyrthei bad ka seng ka sngew ba dei ban pynneh iaka kum ka jaka jngohkai pyrthei . Kane ka krem ka don la ka jong ka khana pateng kumba la ngeit da ki trai shnong namar kata ka jingpynkylla iaka kum ka jaka lehniam kan sa wanrah pynban iaka jingialam bakla halor ka khana pateng jongka naka jingshisha kaba ki trai shnong ki ngeit bad ki tip.
Ka jingpynlong jaka lehniam ia kane ka jaka khlempep kan sa pynsniewdur ruh ia kane ka jaka kaba dei kawei ka jaka ba paw hapoh jong ka thain. Ki mawjymbuiñ ha katei ka krem kim dei kiba don bynta ha kano kano ka jingngeit ne ba shu wan dur phylla kumtei hynrei dei lyngba ka jingiaid ka um ha sad jong ki krem bad pynkha ia kitei ki dur maw kiba ha ka science ki ong ki stalactites.
Ka um kaba hap na ki stalactites pat ka jaw ha madan jong ka krem bad pynkha ia ki juh ki dur maw kiba la tip kum ki stalagmites. Kumta dei ban sngewthuh ba ki stalactites bad stalagmites kim dei ki kam phylla jong kano kano ka niam hynrei dei ki kam phylla jong ka mariang hi bad ia kine ym dei ba lap kyrpang tang ha ka Bri U Hynñiewtrep hynrei ki don ha satlak ka pyrthei baroh kawei.
Ka seng kan iatreilang bad ka shong ban kan nym shah iano iano ban wan thombor ne leh jubor pyrshah iaki trai ri trai muluk ne iaki trai shnong ioh kan ktah ruh iaka hok longtrai nangne shakhmat.
Ka seng kan iai kyrshan ruh haduh ba kut iaka Durbar Shnong Mawsynram halor ka nongrim kaba ka ka ieng haba iadei bad ka krem Mawjymbuin, kane ka long katkum ka kyrwoh bala phah da u President ka KSU SWKH District bah Forwardman Nongrem.
