Shillong, Lber 06: Ka jaka ieng kali ha iew Bhoirymbong ka dei ka jaka kaba bun bha ki kali bad ha kane ka surok la pynieng ia ki kali na baroh arliang bad ka jingbun ki kali ha kane ka jaka kam dei shuh tang ha ka sngi iew hynrei ka la long man ka sngi.
Ka Bhoirymbong ka dei ka iew kaba heh duh na ka bynta ka ri bhoi mihngi namar dei ha kane ka iew ka iadie iathied iew syiem ka dei ka iew kaba heh bha ha kaba ka jingshalan ia u sying ka long na kane ka jaka shabar ka jylla.
Ki nongshong shnong ki la pynpaw ba la donkam ban don kawei pat ka surok ban pyllait ba ki kali heh kin nym rung na kane ka surok haba ki mut ban leit sha ki shnong ki thaw kiba don sha khmat jong ka Bhoirymbong namar bunsien lada ar tylli ki kali heh kawei ka kiew bad kawei ka hiar ka wanrah ia ka jingdheng kali da ki bun kynta.
Kaei kaba la jia mynta ka sngi ba artylli ki trok kila sah kut hapdeng surok namar ba kim lah shuh ban iaid shadien ne shakhmat namar na baroh arliang ki don ki kali kiba ieng kum kane ka jingjia kam dei ka sien kaba nyngkong hynrei kala ju jia bunsien bad la kyntu ia ka PWD ba kan peit lem ia kane ka jingeh.
U wei na ki riew rangbah u la pynsngew ba lada don ka lad la dei ban don sa kawei ka surok ka ban iaid na sharud jong ka iew khnang ba ki trok kin nym shem shitom bad ha kajuh ka por ba kan nym don ka jingsahkut kali kaba da ki kynta
