Shillong, Nohprah 11: Kum ka jingpynkreh ia ka Elekshon MP sha Lok Sabha ka ban long ha u snem 20024, ha ryngkat ba ka ri baroh kawei mynta ka sngi ka Deputy Commissioner jong ka East Khasi Hills District ka kong RM Kurbah kala khaweh ia ka lama ban pyniaid paidbah ia ki kali ban don ia ki kor thep vote EVM bad VVPat ha ophis mynta ka sngi.
Haba kren ha ka jingialang kaba la long ha phyllaw jong ka ophis jong ka DC ka East Khasi Hills District kala ong ba kane ka jingsdang ban pyniaid ia kine ki kali ka long ha baroh kawei ka Ri India bad ha Shillong ruh la sdang mynta ka sngi, kane ka long ban pynshai sha ki paidbah ba kin ia shim bynta ha ka elekshon MP.
La ong ba ha East Khasi Hills District ki don 102 ngut ki ophis ba dei peit ia ki jaka jaka ba ia dei bad ka elekshon, la pynkynmaw ba ka jingpyndon kam ia kine ki kor thep vote EVM ka long ha ka Elekshon MLA ha Goa ha u snem 1999 bad sha kiwei ki jylla ha u snem 2003 bad ha ka MP elekshon 2004.
Kala iathuh ba ha East Khasi Hills District ki don 113 tylli ki jaka thep vote bad 6 lak ngut ki nongthep vote bad ka jingpoi ki paidbah ban thep vote ha kane MLA bala dei kala kot sha ka 80% kumta la kyntu ia ki paidbah ba kin wan sha khmat ha kane ka MP Elekshon ruh kum juh.
Kala kyntu ia ki samla kiba la kot sha ka 18 snem ka rta ba kin wan sha khmat ba register iala de ban long ki nongthep ban ia shim bynta ha kane ka shynshar paidbah kaba heh tam ha ka pyrthei.
Ha ka jingkren pdiang burom ia kiba la wan ban ia shim bynta u ADC u bah D. Wahlang u la kyntu ia ki seng sain pyrthei ba kin ia trei lang kumba la juh long man ka por ha kane ka kynti kaba mynta, la kdew ba ka Ri India ka dei ka ri synshar paidbah kaba heh tam ha ka pyrthei bad ki don ki ri ba mar jan ki kwah ia kane hynrei kim ioh.
Ha kane ka sngi ki seng sain pyrthei kiba la ia poi ban ia shim bynta lang ha kane ka jingsdang ban pynkhreh ia ka MP elekshon ki long ka INC, BJP, UDP bad HSPDP, ha kane ka sngi la pynlong ruh ia ka jingthep vote ban pynthikna ba ki kor thep vote EVM bad VVPat ki trei kam.
