Shillong, Nailur 26: Ka sorkar Meghalaya Democratic Alliance (MDA) hapoh ka jingialam jong u ka seng National People’s Party (NPP) kin wanrah ia ka rai sorkar ban pynkylla noh ia ka ktien khasi kum ka ktien sorkar hapoh iing dorbar thawain la shai ka sngi kut jong ka jingiashong dorbar.
Kumba ka long haduh mynta ia ka ktien khasi dang niew tang kawei na ka ktien ba lah ban pyndon kam ha ki ophis sorkar ia kaba la tip kum ka “Associate official language”. Ia kaba la wanrah hapoh ka iing dorbar ha u snem 2005 da kaba wanrah ia ka Meghalaya Language Act, 2005.
Lada ka iing dorbar thawain jong ka jylla ka lah ban pdiang la shai ka sngi hapoh ka iing dorbar ia ka rai ka ban wanrah da ka sorkar, kan long u wei pat u mawjam na ka bynta ka jingiakhih jong ka Khasi Author’s Society ban ioh ban pynrung ia ka ktien khasi ha ka khyrngit kaba phra jong ka Riti synshar jong ka Ri India.
Dang ha ka 22 tarik mynta u bnai ka KAS kala pynlong ia ka jingiaid paidbah ban dawa na ka sorkar pdeng ba ka dei ban pynrung noh ia ka ktien khasi ha ka khyrngit kaba phra bad ha ka jingialang paidbah ha Madan Malki la dawa ba ka sorkar ka dei ban wanrah ia ka rai ha kane ka sien shong dorbar synrai kaba dang iaid mynta.
