Shillong, Jymmang 31: Ka tnad Social Welfare jong ka sorkar jylla kam shym la ioh phom khaw rshon mynta la slem na ka tnad sam bam jong ka sorkar na ka bynta jong kito kiba don jingduna ha dkhot met.
Katkum ki khubor kia la ioh da u SP News Agency la iathuh ba ka ophis jong ka District Social Welfare jong ka East Khasi Hills District kam shym la ioh ia ki phome na ka tnad sam bam jong ka sorkar mynta la slem bha.
Haba ia dei bad kiba don jingduna ha ki dkhot, ban pynioh khaw rashon na ka bynta jong ki la hap ban ioh ia ka jingmynjur jong ka tnad social welfare kaba dei peit ia ki, ha dien ba kila pynbiang ia ki jingdon kam ki sa phah sha ka tnad sam bam ban ai ia ka kard rashon.
Katkum ka jingtip kiba la ioh ki dang don bun bha kiba la ioh iaka syrnot na ka tnad Social Welfare ba ki don ka jingduna ha ki dkhot met kiba khlem pat ioh ia khaw rashon kaba ki dei ban ioh ia ka bhah ka jong ki. La ioh jingtip ba haba ki la leit ban wat phom la ong ba la slem mynta khlem pat ioh na ka tnad sam bam ia ki phom khaw rashon.
