Shillong Rymphang16: Da ka hukum jong u Lat ka jylla ka tnad Political Department ka sorkar jylla ha ka 14/Rymphang/ 2026 kala pynmih ia ka jing pynbna sorkar ba la thung ia u nongbishar ba la shongthait u justice R.S Chauhan ban tohkit ia ka jingiap ki briew ha krem dewiong ha Mynsngat -Thangsko ha East Jaintia Hills District kaba la jia ha ka 5/Rymphang/2026.
Ka tei ka jingjia ka dei na ka daw jong ka jingtih dewiong kaba khlem da ioh jingbit kaba la pynlong ba bun ki mynsiem briew ki la duh ei ia la ka jong ka jingim dei halor kane ka nongrim ka sorkar ka la rai ban thung ia ka kynhun tohkit katkum ka Commission of Inquiry Act,1952 ha kaba u Lat ka jylla u la thung ia u Justice R.S.Chauhan ban long u shongknor.
Kiwei ki dkhot jong kane ka kynhun tohkit ki long u bah H.Nongpluh IPS ba la shongthait bad u bah P.S Dkhar IAS ba la shongthait ba kin tohkit ia katei ka jingjia ha Mynsngat -Thangsko kaba hap ha East Jaintia Hills District hapoh ki kyndon kiba la buh,ha kaba kane ka kynhun tohkit kan ai ia ka kaiphod halor ka jingshem jong ka bad ka jingai jingmut hapoh ka 6 bnai naduh ba la sdang ia ka jingtohkit.
Ka Commission ka lah ban shim ia ka jingiarap jong ki riew shemphang, ki riewstad lada ki sngew donkam ha kaba ia dei bad kane ka jingtohkit bad ka bor baroh la ai ha ka katkum ki kyndon kiba don ha ka Commission of Inquiry Act ,1952 (60 of 1952) kiba ka Commission ka don ia ka jinglut jingsep baroh yn bei na ka tnad sorkar kaba peit ia ki Mar Pohkhyndew.
