Shillong, Naiwieng 21: Ka Central Recruitment Board (CRB) ka tnad Meghalaya Police (MLP) kala pynsangeh shuwa shipor ia ka eksam Physical Efficiency Test (PET) namar ka jingshem ia ki jingduna bad jingbym biang ha ka jingpynlong ia kane ka eksam ha 1st MLP Battallion Mawlong bad 4th MLP Battalion ha Sohpian.
Kane ka eksam PET ba long ha 1st MLP bad 4th MLP battalion ki dei kiba la pynlong naduh ka 18 tarik Naiwieng haduh ka 21 tarik Naiwieng, ha dien ba la lap ba ka don ka jingduna kumta la hap pynsangeh shuwa.
Kat kum ka kyrwoh ba la phah da u Member secretary Central Recruitment Board u bah Lakador Syiem IPS u la ong ba ka CRB kala ioh jingtip ba ka don ka jingduna bad jingbym biang ha ka eksam PET ba long ha kine ki artylli ki Battallion bad ka CRB ka dang bishar bha ia kane ka kam.
Haba pyntip ba ka CRB kala kut jingmut ban pynlong ia ka eksam PET kaba lait na ki jingbakla, ula ong “Namar kata, ka CRB kala pynsangeh shuwa shipor ia ka eksam PET ba dang iaid mynta naduh ka 22 tarik Naiwieng”.
Une u heh Pulit u ong ba ka CRB kan sa pynbna ia ka tarik ba thymmai kham hadien bad kan ailad kumjuh ia baroh ki kyrtong kiba iakhun ia ka eksam. Ula kyntu ia ki kyrtong ba kin long kiba iai shah bad ban sngewthuh lem khnang ban lah pynlong ia ka eksam kaba khuid, bad kaba iaid beit iaid ryntih.
