Shillong, Risaw 31: Ka Khasi Students’ Union lyngba ka Employment Monitoring Cell ka la phah dorkhas sha u bah Prestone Tynsong, Deputy Chief Minister ba dei peit iaka tnad kam poh iing halor ka jingbymbeit ka rukom thungkam ha Directorate ka Prosecution ba la pynlong da ka MPSC.
Ka Seng bad ki paidbah hi kam sngew pher shuh ia ka jingtorti ka rukom thungkam thungjam lyngba ka MPSC bad kane kan dang iai jia katba pat pynkylla ia ka rukom treikam jong ka MPSC.Ha kaba iadei bad kane ka bynta, la khot applikoshon na bynta 6 tylli ki kam Asst. Public Prosecutor ha u snem 2023.
Katkum ka jingkhot apply kam uno uno ne kano kano ba kwah ban apply na bynta kine ki kam , ki hap ban don 3 snem ka jingtbit kaba mut ki dei ban dei ki muktiar kiba la ia said ha iing bishar ym duna ia ka 3 snem bad ki dei ruh ban long kiba la pyndep ia kino kino ki mukotduma kam sniew.
Hynrei kaba sngew lyngngoh ka long ba uwei na kine kiba pass bad mih kyrteng um shim la lah ban pynbiang ia kitei ki kyndon ba don ha ka jingkhot apply kam ka kynnoh ka KSU ha ka jingthoh kaba la ai sha u myntri kam poh iing.
Ka Seng ka la lap ruh ba u dang shu pass ia ka eksamin ha u snem 2023 bad lehse um nym pat lah ban pyndep ruh ia ka eksamin All India Bar Examination (AIBE) kawei na ki eksamin ba ki muktiar ki hap ban pass hadien ba la ioh law degree ban lah ban ioh Laisen ban ia sait kum u muktiar ha iing bishar.
Ka jingshah jied jong une u kandidate ka pyni ba ka don eiei sha lyndet ba la MPSC ka pynkheiñ hi ia ka kyndon ba ka lah buh. Haba kim pyntreikam ia ki kyndon te ka myntoi aiu ban buh bad ha kajuh ka por ka jingdon jong kine ki kyndon ka pynlong ia kiwei ba dang shu pass ba nym ioh apply. Ka Seng ka dawa ba ka tnad kam poh iing ka dei ban pynbeit ia kine ki jingkynrum kynram bad jied ia ki briew kiba dei hok ban ioh.
