Shillong, Nailur 03: Ha ka jingleit sha South West Khasi Hills distrik mynta ka sngi, u Myntri Sorkar Pdeng ba dei khmih ia ka tnad Kam Jngoh Kai, Gajendra Singh Shekhawat u la iaroh ia ka deiriti bad ka mariang jong ka Meghalaya. U la ong ba kaba bun ka lad ha ka kam jngohkai jong ka ri ka don ha ka thain shateilammihngi bad khamtam ha Meghalaya.
U la kyntu ia baroh ban wan jngoh ia ka Meghalaya bad u la ong, “Ka Meghalaya ka don ka lad kaba heh ban kyntiew ia ka kam jngohkai ha ka jylla. To baroh ngin leit bad sakhiia ka Meghalaya, ka deiriti bad ka jingitynnad jong ka mariang ha kane ka jylla.”
Ha kane ka jingleit jong u, u Myntri Sorkar Pdeng u la leitjngohia ki jaka bapher bapher, ba kynthup ka Hot Spring ha ka shnong Jakrem, SynrangMawrinha ka shnong Mawten, Mawkyrduk Monolith (Tynrong) ha ka shnong Mawlangwir, bad ka Mawranglang Viewpoint ha ka shnong Mawranglang.
Ha ka jingleitjngoh jong u ia kine ki jaka, ka la don ka jingpyni ia ki jingrwai na Ki Sur Ki Nongkyndong bad ki jingshad tynrai na ka Ri-Maram Folk Academy na Mawlangwir.
Ha ka jingai jingkren jong u, u la iarohia ka jingtrei shitom jong ki ban pynlong ia kane ka prokram pyni deiriti ha kane ka jaka jngohkai ba la kyntiew da ka Sorkar Jylla.
U Shekhawat u la ban jur halor ka jingkongsan jong ka kam jngohkai ha ka jingiaid lynti ka India ban long ka ri kaba la kiew shaphrang shuwa u snem 2047.
U la ong, “Baroh ngi tip ba ka ri jong ngi hapoh ka jingialam jong u Myntri Rangbah Duh, Narendra Modi ka dang iaid ha ka lynti ban long ka ri kaba la kiewshaphrangshuwa u snem 2047.
La ithuh ia ka India kum kawei na ki ri ha ka pyrthei ba kiewsted tam ha ka ioh ka kot bad ki lad ki lynti kiba don ha ka kam jngohkai ki dang kham bun katba dang iaid ki sngi.”
U la ong ruh ba kiba bun na kine ki lad ki don ha ka thain shateilammihngi bad khamtam ha Meghalaya. Baroh ki jylla ka thain shateilammihngi ki la ioh ka jingkyrkhu ha ka liang jong ka jingiar ka deiriti bad ka jingitynnad ka maariang, u la ong.
U Myntri u la kren ruh shaphang ki jingiakren jong u bad ki Myntri ki tnad kam jngohkai jong ki Sorkar Jylla, Union Territory na ka thain mihngi bad ka thain shateihynnin ka sngi ha nongbah Shillong ia kaba la pynlong ban sngewthuh bad kyntiew ia ki lad kiba don ha ka kam jongohkai ha ka thain shateilammihngi.
Ki jylla ki la pyni ia ki rukom treikam jong ki ha ka kam jngohkai ha kaba ki la iasam ia ki jingjop bad ki jingeh. U Myntri u la iaroh ia ki sienjam jong ki Sorkar Jylla ha kaba u la ong.
“Ki Sorkar Jylla ki la iathuh ia ki jingpynkhreh kam jong ki bad ki lad kiba don ha kane ka jingialang hynnin ka sngi bad ngangeit skhem ba ki thong kiba heh jong ki kin plie ia ki lad ia ki nongjngohkai ki ban wan sha ki jylla ban sakhi ia ka deiriti, ki jaka ba itynnad bad ka suinbneng kaba pyngngad.”
U la ong shuh shuh, “Ka jingkyntiew ia ka kam jngohkai kan wanrah ia ka jingkylla kaba khraw ha ka jingim jong ki briew hangne, ka ioh ka kot jong ki kan kiew, ka rukom im jong ki kan kylla bad ngakyrmen ba ha kine ki por ki ban wan, ka kam jngohkai kan kyntiew ia ka ioh ka kot jong ki jylla ka thain shateilammihngi.”
Shuh shuh, la aiti ia ki dorkhas sha u Myntri Sorkar Pdeng da u MLA ka thain, Bah ReniktonLyngdohTongkhar, ryngkat ki dkhot na ka Dorbar Shnong Mawten, Principal jong kaSngapSyiem College Mawkyrwat, bad u Rangbah Shnong jong ka Dorbar Shnong Mawlangwir.
U Myntri Sorkar Pdeng u la ong ruh ba un leh ia kaba donkam ban pynbeit ia ki jingeh jong ka thain bad u la ong, “Ka Sorkar India hapoh ka jingialam jong u Myntri Rangbah Duh, Narendra Modi ka ieng skhem ban kyntiew ia kine ki jylla ka thain shateilammihngi bad ki lad kiba don ha ka kam jngohkai ha kine ki jylla kiba itynnad.”
Hadien kane, u Myntri u la pyniaid ia ka jingialang peit bniah ban lum jingtip shaphang ki skhim ba iadei bad ka kam jngohkai ha ka distrik. Ha kane ka jingialang, u Myntri u la kylli shaphang ka jingwan ki nongjngohkai, ka jingpyntreikam ia ki homestay ha ka thain.
U la peit bniah ia ki skhim bapher bapher, ba kynthup ia ka Mahatma Gandhi National Rural Employment Guarantee Act (MGNREGA), Pradhan Mantri AdiAdarsh Gram Yojana (PMAAGY), Prime Minister’s Employment Generation Programme (PMEGP) Community-Led Tourism Infrastructure Scheme bad kiwei kiwei ki sienjam ba thmu ban kyntiew ia ka kam jngohkai ha ka distrik.
Ha kane ka jingialang la iakren ruh shaphang ki kam bad ki prokram ban kyntiew ia ka kam jngohkai ha ka distrik, kumjuh ruh ka jingkongsan ban kyntiew ia ki homestay bad pynthikna ka jingdon ki jingdonkam kum ki jaka bam ha ki jaka jngohkai.
