Shillong, Lber 01: U Myntri ka sorkar pdeng ba dei peit ia ka Tnad Social Justice and Empowerment jong ka Sorkar India, u Dr. Virendra Kumar, u la leit jngoh ia ka Composite Regional Centre for Skill Development, Rehabilitation and Empowerment of Persons with Disabilities (CRCSRE), Shillong, mynta ka sngi kum shi bynta ka jingwan jngoh jong u ia ka jylla Meghalaya kaba lai sngi.
Ha kane ka jingleit jngoh jong u, u Myntri ka Sorkar Pdeng u la peit bniah ïa ki kam ba dang ïaid shakhmat jong ka Centre bad u la ïakren bad ki nongïoh jingmyntoi, ki kmie ki kpa bad ki nongtrei. U la pynpaw ka jingsngewhun halor ka jingiaid shaphrang ha kaba ai ïa ki jingshakri ha ka liang ka jingsumar, ka jingai jinghikai ban kyntiew ïa ki sap, ki tiar ai jingïarap bad ka jingkyrshan ha ka pule puthi ïa ki briew kiba don jingduna ha ki dkhot met ha ka Jylla.
Haba ai jingkren ha ka jingialang, u Dr. Kumar u la ong ba ynda la pyndep ia ki jingdonkam ha kaba iadei bad ka jaka bad ki jingdon jingem, yn sa sdang ia ka jingtei bad jingpynheh ia ka CRC campus kaba pura, ryngkat bad ki tiar kiba katkum ka juk mynta bad ki jaka ai jinghikai kiba la pynbha ban pynkhlain shuh shuh ia ki jingshakri.
U la ban jur ba ki CRC ha kylleng ka ri, ryngkat bad ki National Institute kiba don hapoh ka Tnad Empowerment of Persons with Disabilities, ki trei shitom ban ai ka jingsumar, ka jingai jinghikai ban ioh kam bad ki lad ai jingsumar ïa ki briew kiba don jing duna ha ki dkhot met.
Haba pynkynmaw biang ïa ka jingkut jingmut jong ka Sorkar India na ka bynta ka roi ka par kaba kynthup ïa baroh, u Myntri u la ban jur ba ka jingpynkupbor ïa ki briew kiba don jingduna ha ki dkhot met ka dang long ka mat ba kongsan hapoh ka jingthmu jong ka “Sabka Saath, Sabka Vikas, Sabka Vishwas.”
U la ong ba ki scholarship, ki sienjam ban kyntiew ia ki sap, ka jingsam ia ki tiar jingiarap bad ki skhim ban kyntiew ia ka kamai kajih ka plie lad ia ki briew kiba don jingduna ha ki dkhot met ban ioh ia ka jinglah ban shaniah halade bad ka burom. U la kren ruh shaphang ka jingsdang ïa ki Prime Minister Divyang Centre kiba thmu ban pynbeit ryntih ïa ka jingbishar bniah bad ban sam ïa ki tiar jingïarap ha ka por kaba biang.
Ïa u Myntri la pdiang sngewbha da u Dr. P. P. Mohanty, Director, Swami Vivekanand National Institute of Rehabilitation Training and Research (SVNIRTAR), Cuttack, Odisha, bad u Dr. Ram Shakal Sahani, Director, CRCSRE Shillong.
Ka la don ka jingbatai kaba bniah kaba pyni ïa ki kam bad ki jingjop jong ka Centre ba la ai da u Dr. Ram Shakal Sahani, ryngkat bad ka jingïathuh lyngkot shaphang prokram ai jingtip jong ka centre bad ki jingpynkhreh kam na ka bynta ki por ban wan, bud sa ki jingpyni kolshor da ki samla pule bad ki nongïoh jingmyntoi.
Ha kane ka prokram, ki nongioh jingmyntoi ki la iathuh ia ki jingshem jong ki. Ka Topa Dey, ka samla pule kaba la pynrung kyrteng ha ka prokram jong ka Centre kaba ioh ei ban ioh jinghikai ban ioh kam, ka la ai khublei ïa u Myntri Sorkar Pdeng bad ki nonghikai kiba la sdang ïa ki jingai jinghikai na ka bynta ki eksamin ban ioh kam. Ka la ïathuh ba ka la pyndep ïa ka eksamin ba nyngkong na ka bynta ka SBI bad ka dang ïoh ïa ka stipend man la u bnai kum ka jingkyrshan pisa. Ka la pynshlur ia ki para samla pule ban shimkhia ia ka course na ka bynta ka lawei kaba bha.
U Shantanu Behra u kpa jong u nongïoh jingmyntoi u Biswajit Behra ruh u la ïasam ïa ka jingshem jong u. U dei na Odisha bad mynta u trei ha ka Assam Rifles, u la ïathuh ba ïa u khun jong u la ithuh kum u khynnah ba kyrpang ha ka rta kaba dang rit bad kham mynshwa la phah ïa u sha CRC Guwahati na ka bynta ban ioh ia ki jingshakri.
U la pynpaw ka jingsngewsuk ba da ka jingplie ia ka CRC Shillong, ka jingsumar bad jingkyrshan kaba man ka por ka la nang kham suk. U la ong ba ka Centre ka la wanrah ka jingkylla kaba bha ha ka jingim jong u khun jong u bad u la pynpaw ka jingsngewnguh kaba khraw ïa ki nongtrei na ka bynta ka jingaiti bad jingshakri jong ki.
Ha kane ka sngi, u Myntri Sorkar Pdeng u la sam ia ki tiar jingiarap sha ki nongioh jingmyntoi, kynthup ia ki tiar ai jinghikai, ki shuki cerebral palsy bad ki kor suh jain ban kyntiew ia ka jingtreikam lajong bad ka jinglong laitluid ha ka jingim.
Ha kane ka prokram la iadonlang u Dr. Ram Shakal Sahani, Director, CRCSRE-Shillong; Dr. P. P. Mohanty, Director, SVNIRTAR; Kong Camelia Doreen Lyngwa, Director, Tnad Social Welfare, Sorkar Meghalaya, ryngkat bad u Commissioner bad Deputy Commissioner na ka bynta ki briew kiba don jing duna ha ki dkhot met (PwDs), Sorkar Meghalaya, ki ophisar jong ka Tnad Social Welfare; ki ophisar jong ka Tnad Social Justice and Empowerment; Sorkar India, ki nongtrei bad ki samla pule jong ka CRC-Shillong; ki dkhot jong ki kynhun kiba trei na ka bynta ki briew kiba don jingduna ha ki dkhot met, bad ki nongioh jingmyntoi ryngkat bad ki kmie ki kpa jong ki.
