Gangtok, Lber 11: Ka kynhun ki nongthoh khubor na Meghalaya, kaba don mynta ha ka media exposure tour kaba hynriew sngi sha Sikkim kaba la pynlong da ka Press Information Bureau (PIB) Shillong ha ryngkat ki ophisar jong ka PIB Gangtok, mynta ka sngi ki la leit jngoh ia ka Rumtek Monastery kaba pawnam, kawei na ki jaka ba kongsan tam jong ka Tibetan Buddhism ha ka thain Himalaya.
Ka don kumba 24 kilomitar na Gangtok, ka monastery ka long kum ka jaka ba kongsan jong ka dustur Karma Kagyu bad kadei kawei na ki monastery ba heh tam ha Sikkim.
Ha kane ka jingleit, ia ka kynhun la pdiang sngewbha da ki monk jong ka monastery, ha kaba uwei u monk ba rangbah u la batai bniah ia ki nongthoh khubor shaphang ka histori, ka bynta ha ka jingngeit bad ki jinghikai kiba iadei bad kane ka monastery.
Ka Karmapa kaba 16 ka la seng ia ka Rumtek kum ka jaka ba kongsan jong ka skul Karma Kagyu shabar ka Tibet. La kyntiew ia kane ka monastery kum ka Dharma Chakra Centre, kaba mynta ka long ka jaka kaba kongsan na ka bynta ka jinghikai ia ki Buddhist, ka jingpynleit jingmut bad ka jingleh niam.
U monk u la batai ruh ba ia ka jaka jong ka monastery la khein ba ka long kaba kongsan ha ka jingngeit. La ker sawdong da ki lum bad ki wahduid, ia kane ka jaka la niew ha ka riti dustur jong ki Buddhist kum ka jaka kaba biang bha na ka bynta ka jingpynleit jingmut, ka jingioh jinghikai bad ka jingkyntiew ia ka jinglong ba kynja mynsiem.
Ki nongthoh khubor ki la leit jngoh ïa ka monastery complex bad ki la sakhi ïa ki katto katne ki jinglong ba kyrpang kynthup ïa ki prayer wheel tynrai kiba heh, ki dur ba la shna da ki jingdro ba itynnad jong ki Buddhist bad ki dur thangka kiba itynnad bha kiba pyni ïa ki briew kiba kongsan bad ki jinghikai jong ka niam Buddhist.
Kane ka monastery ka dei ka jaka sah jong kumba 300 ngut ki monk, kiba shong bad pule hapoh kane ka complex bad ki bud ïa ka rukom long monk kaba ryntih kaba kynthup ïa ki jingduwai, ka jingpynleit jingmut, ki jingpule ïa ki jingthoh bakhuid bad ki jingleh niam.
La pyni ruh ia ka kynhun ia ka Golden Stupa, kaba don ia ki tiar ba kyntang. Kane ka monastery complex ka don ruh ïa ka Nalanda Institute for Higher Buddhist Studies, ha kaba ki monk ki ïoh ïa ka jinghikai ha ka saiñ pyrkhat Buddhist, ki jingthoh bakhuid, ka jingïakren bad ka jingpynleit jingmut.
Ha ka jingïakren, u monk u la batai ïa ki jinghikai ba kongsan jong ka niam Buddist kaba la pynshong nongrim ha ka jingim bad ka sain pyrkhat jong u Gautama Buddha, da kaba pyni ïa ki nongrim kum ka jingsngewrit, ka jingpyrkhat bad ka jingstad kum ka bynta pdeng ban ïoh ïa ka jingsuk hapoh bad ka jingïatylli.
Une u monk u la kren ruh shaphang ka dustur Black Hat (Vajra Mukut) ba kyntang kaba ïadei bad ka pateng jong ki Karmapa. Ia ka Black Crown la niew kum kawei na ki dak ba la burom bha jong ka dustur Karma Kagyu bad ka pyni ia ka bor ba kynja mynsiem bad ka jingtrei da ka jingshai jong ki Karmapa.
La ai jingtip ia ka kynhun shaphang ka Black Crown Ceremony kaba kongsan, ka jingleh niam kaba kyntang kaba ju leh da u Karmapa na ka bynta ki riewngeit, kaba la ngeit ba kan ai mynsiem ïa ki nongbud ha ka lynti jong ka jingkyntiew ia ka jingngeit.
Ki nongthoh khubor kiba la leit jngoh ki la ong ruh ba ki iohi ia ka Rumtek Monastery kadei kawei na ki jaka ba paw bha ha kaba iadei bad ka niam bad ka kolshor jong ka Sikkim, kaba khring ïa ki nongleit pilkrim, ki riewstad bad ki nongjngohkai pyrthei na kylleng ka ri India bad nabar ri ruh.
Ka jingitynnad ki sawdong sawkun, ka pateng jong ka jingngeit kaba riewspah bad ka jingtei ba itynnad ha ka rukom shna jingshna jong ki nong Tibet ka pynlong ia ka kum ka jaka kaba kongsan na ka bynta ka jingpule Buddhist bad kumjuh ruh ka jaka ba kongsan na ka bynta ka kolshor bad ka jingngeit ha ka jylla.
