Shillong, Naitung 14: Ka KSU South East Central Circle, ha ka sngi Saitjain jong ka 13 tarik ka la leit ban khynra work permit ïa ki bar jylla kiba wan ban trei sha ki thaiñ Pynursla bad ha kane ka sngi ka KSU ka la ïoh ban pynphai ia ki katto katne ngut ki nongtrei bar jylla kiba trei ha shna ïing ïa ka ophis jong u Block Development Officer ka Pynursla C&RD Block namar ki wan trei khlem ka work permit kaba donkam ïa kino kino ki bar jylla kiba trei bylla ban ïoh ïa kane ka permit.
Haba kren na ka liang u President ka KSU South East Central Circle u Samla Wallamjingshngaiñ Suting u la ong ba kane ka sienjam kaba ka seng ka shim ban kynra ïa ki bar jylla kiba wan trei sha ka thaiñ ka long ban pynthikna ba ki dei ban biang ki kot ki sla.
U la ong ruh ba ha kine ki sngi lah ban ïohi ba ka sorkar lyngba ka tnat pulit ka la kem bad shim ejahar hi pyrshah ïa ki dkhot ka seng kiba khynra work permit hynrei u ong ba kum ka seng kim tieng kim smiej ïa kane ka jingpyrshang pyntieng koh tympan ka sorkar
Haba bynrap, U Vice President ka Circle u Samla Basuklang N Khongwar u la ther tyngeh ïa ka sorkar jylla bad ïa u Myntri Rangbah ka jylla uba la ong ba kam donkam ïa ki briew kiba na bar ban leh ia ka work permit haba ki wan ban trei sha ka jylla bad ong ba kane ka jingkren u Myntri Rangbah ka paw shai kdar ba um tip ïa ka aiñ kaba ka sorkar jong u hi ka shna ban pynmih ïa ka rule.
