Shillong, Lber 6: Mynta ka sngi 6 Lber 2026 ban pynkhreh iaka jingthoh khana samari ka ban long ha u snem 2027 ka sorkar Meghalaya kala lum ia ka jingialang hapoh ka jingpeit jong doktor Pooja Pande IAS State Nodal Officer.
Ka khana samari jong ka Ri India baroh kawei kala dei ban long ha u snem 2021 hynrei na ka daw ka jingwan ka khlam Covid-19 la hap ban pynsangeh noh bad ia kane la buh ban pynlong noh ha u snem 2027.
Ha kane ka jingialang u Shubhasish Chatterjee Joint Director ka tnad khana samari ba dei peit ia ka jylla Meghalaya la batai ba kumno yn iaid shakhmat bad ka jinglum jingkhein ia ka jingdon ki paidbah nongshong shnong ha kane ka jylla.
Ka jingthoh ia ka khana samari kan sdang da kaba buh jingkhein ryntih ia ka jingdon jong ki bad ia kane yn sdang ha ka 1 Jymmang bad yn pyndep ha ka 15 Jymmang mynta u snem 2026 bad ka jingleitlum ia ka jingdonbriew ha man ka thliew iing kan sdang 16 Jymmang haduh ka 14 Jylliew 2026 ia kane la dep ban pynmih ia ka jingpynbna sorkar.
Na ka liang jong u Nodal Officer ka sorkar jylla ka sngewthuh ia ka jingkordor ban thoh khana samari bad kane ka donkam ia ka jingiatreilang jong shibun ka tnad sorkar bapher bapher bad ka tnad thoh khana samari kan hap ban peit ba kan don ka jingiatreilang na baroh ki tnad sorkar ban pynlong ia ka jingthoh khana samari kaba jop.
