Shillong, Iaiong 14: Kum shi bynta ban pynbit pynbiang ia ka jingdonkam ki khynnah skul, ki nonghikai ka Dangar Dombah Government Lower Primary School, kaba don ha ka shnong Dangar East Khasi Hills Dstrict ki hap ban shu ia synniang pisa para nonghikai ban ioh buh helper ban biang ki khynnah ha ka pule ka puthi.
Ha kane ka skul, ki don haduh 309 ngut ki khynnah skul katba ki nonghikai ba long permanent ki don tang lai ngut bad kane ka buh jingeh ia ki nonghikai ban ai jinghikai ba janai ia ki khynnah skul bad ki class ba ai jinghikai kadei naduh nursery haduh class V.
Ha kaba iadei bad kane ka jingeh na ka liang ki bor pyniaid jong ka skul ha u snem 2023 kila sdang ban pan nonghikai na ki bor ba dei khmih hynrei tad haduh kine ki sngi ym shym la urlong satia.
Haba ia kren bad ka Kong V Wanniang kaba dei ka Principal kala iathuh ba hapoh ka skul ki don haduh khyndai tylli ki kamra klass namar ba ki don ki section la ki jong ki jong bad ka shem jingeh ia lai ngut ki nonghikai ban pynbiang ia ka jingshim klass.
Shuh shuh ka Kong Wanniang kala iathuh, “Ban pynbiang ia ka jingdonkam ki khynnah skul ki nonghikai kim banse ban shu ia synniang mar T. 5 Hajar marwei bad kumjuh ruh da ka jingkyrshan ki dkhot ka managing committee bad la ioh ban thung da ki helper kumba 6 ngut ban hikai ia ki khynnah skul”.
Na ka liang jong ki nongpyniaid jong ka skul ki kyrmen skhem ba ki bor ba dei peit kin iarap ban peit lem ha kaba iadei bad kane ka jingeh da kaba kin thung noh kham kloi ia ki nonghikai na ka bynta ka jingbit jingbiang jong ki khynnah skul.
