New Delhi, Jylliew 03: Ka Supreme Court, ha ka Writ Petition Civil No. 645/2022-IMA & Anr.Vs. UOI & Ors. ka la pyllait ia ka jingbthah lyngba ka Hukum ha ka 07.05.2024, ba baroh ki nongpynmih jingpynbna bad kynhun pyniaid jingpynbna ki hap ban ai ia ka ‘Syrnot pynshisha dalade’ shuwa ba kin pynmih ne pyni ia kinokino ki jingpynbna.
Hadien kane ka hukum jong ka Supreme Court, ka Tnat Information and Broadcasting ka la wanrah ia ka bynta kaba thymmai ha ka rynsan Broadcast Seva jong ka Tnat Information and Broadcasting (MIB) na ka bynta ki jingpynbna ha ka TV bad Radio bad ha ka rynsan jong ka Press Council na ka bynta ki jingpynbna ba pyllait ha ki kotkhubor bad digital bad internet.
Ka syrnot ba la soi da u nongmihkhmat jong u nongpynmih jingpynbna bad kynhun pyniaid ia ki jingpynbna, ka dei kaba hap ban pynpoi lyngba kine ki rynsan.
Ia ka rynsan yn pyntreikam naduh ka 4 tarik u Jylliew, 2024. Ki nongpynmih jingpynbna bad kynhun pyniaid ia ki jingpynbna ki hap ban ioh ia kane ka syrnot na ka bynta baroh ki jingpynbna ba thymmai ban pyllait ha lane hadien ka 18 tarik u Jylliew, 2024.
La buh por ar taiew ban ai por ia baroh kiba iadon bynta ha kane ka kam ba kin sngewthuh ia ka kam ban ai jingpynshisha da lade. Ki jingpynbna ba dang iaid mynta kim donkam ia kane ka syrnot ia kaba mynta.
Kane ka jingpynshisha da lade ka dei khnang ban pynthikna ba ka jingpynbna (i) kam ialam baklaia ki briew, bad (ii) ka iaidkatkum baroh ki kyndon, ba kynthup ia kito kiba la batai ha ka Kyndon 7 jong ka Cable Television Networks Rules, 1994 bad ki Norms of Journalistic Conduct jong ka Press Council of India.
Ki nongpynmih jingpynbna ki dei ban ai ka jingpynshisha ba ki la dep upload ia ka syrnot jingpynshisha da lade sha ki nongpynmih, nongshon, lane rynsan electronic media. Katkum ka hukum jong ka Supreme Court, yn ym shah ban pynmih ia kano kano ka jingpynbna ha ka television, kotkhubor lane ka internet khlem kane ka syrnot pynshisha dalade.
Kane ka hukum jong ka Supreme Court ka dei sa kawei ka sienjam na ka bynta ka jingshai, ka jingiada ia ki nongthied bad ka rukom ai jingbynbna da ka jingbahkhlieh. Ka Tnat Information bad Broadcasting ka kyntu ia baroh ki nongpynmih jingpynbna, ki broadcaster bad ki publisher ba kin bud ryntih ia kane ka hukum.
