Shillong, Jymmang 20: U Deputy Chief Minister u bah Prestone Tynsong haba jubab ia ka mat jingiakren kaba la wan rah da u bah Process T Sawkmie ha kaba ia dei bad ka jingiap khlam ki sniang ha ka jylla.
U bah Prestone u la ong ba na ka liang jong ka sorkar kam don ka jingiarap ia kiba iap khlam sniang haba ia dei bad ka jingong ba la don kam ia ki Ambulance hapoh ka tnad ri jingri na ka liang jong u myntri ba dei peit ia kane ka tnad u la iathuh hapoh ka iing dorbar ba ki don ki Mobile Ambulance.
U bah Prestone u la pynshai ruh ba kane ka jingiap khlam jong ki sniang kan nym ia bit bad ki briew bad kito kiba shet ia ka doh sniang ki hap ban shet bha. Na ka liang jong ka tnad Ri Jingri jong ka sorkar kala shim ia kilad ki lynti baroh ban iada na ka jingsa phriang ia kane ka jingiap khlam ki sniang hapoh ka jylla.
U bah Prestone u la iathuh ba ka jingiap jong ki sniang kala long ha East Khasi Hills District, Ri Bhoi District, West Khasi Hills District, East Garo Hills District, East Jiantia Hills District bad ha West Jiantia Hills District.
Haba ia dei bad ka jingiap jong ki sniang ka tnad Ri Jingri kala leh ia ka post mortem bad la phah ia ki sha ICAR Umiam bad ka daw jong ka jingiap ka dei na ka Classical Swine Flue, ki don kiba iap ruh kiba dei na kiwei pat ki jingpang jong ki sniang.
