Shillong, Jylliew 27: U myntri ka tnad pule puthi ka jylla u Bah Lahkmen Rymbui mynta ka sngi u la ia kynduh ia baroh ki nongpyniaid skul kiba dei jong ki rit paid ban ia sngewthuh ha kaba ia dei bad ka “Draft Education policy” jong ka sorkar pdeng.
Ha kane ka jingiakynduh la ia kren sani halor kane ka bynta ha kaba ki nongpyniaid skul kila pynsngew ia la ka jong ka jingeh jong ki bad na ka liang jong ka sorkar ruh kala sngap ia ki bad na ka liang jong ka sorkar kan sa ia kren bad ka sorkar pdeng ha kaba ia dei bad ki jingeh kaba ki la pynpaw.
U myntri ba dei peit ia ka pule puthi u la iathuh ba ki don ki jingeh bad ha ka juh ka por kane ka “Draft policy” thymmai kan kyntiew ruh iaka pule ha ka jylla bad ha ka Ri India baroh kawei. Na ka liang jong ka sorkar ia mynta kan ia kren bad ka sorkar pdeng ba ia ka rukom pule dei ban pynneh kumba ka long mynta.
U la ia nuksa ba ka sorkar jylla kala seng buh ki jaka pule kum ki B.Ed, ka sorkar jylla mynta ka don hynniew tylli ki jaka pule, katkum kane ka policy ka mut ba ka sorkar jylla ka hap ban khang ia kine ki jaka pule bad kumno ban leh ia ki mynta ka don ha pdeng ka jingkylli.
Dei na kane ka daw ba ia ka B.Ed college kaba don ha Mynthong ka sorkar kam shym la lah ban plie ia ka namar kala wan kane ka “Draft Education Policy” jong ka sorkar pdeng. Ia kane ka jaka ha mynthong mynta ka sorkar kan pyndon kam noh da kaba rah noh ia ki samla pule na ka Kiang Nangbah College kiba dei Klass XI bad XII sha katei ka jaka ha Mynthong.
Ha ka juh ka por ha kaba ia dei bad ka pisa ban thung ia ki nonghikai namar katkum kane ka policy kaba ki khynnah ki dei ban leit skul naduh lai snem. Ka sorkar jylla kan don ha pdeng ka jingeh ha kaba ia dei bad ka jingsiew.
