Shillong, Lber 29: Ka jylla Meghalaya kala dang ioh shuh shuh ia ki briew ba kin long nongput referee, ha kine ki sngi lai ngut ki briew na kane ka jylla kila pass ia ka eksam bad kila la pynbit ban poi sha ka kyrdan kaba san jong ka All India Football Federation.
Ki lai ngut kiba la pass ia ka eksamin ban put refree ki long ka kong Pipilmoris Wanniang, kong Shidalin L Marshillong kine baroh ar ngut ki dei ki kynthie bad u bah Jespar Syiemlieh ba dei u nongput refree shynang.
Ia kane ka eksamin la pynlong naduh ka 25 haduh 27 mynta u bnai ha LNIPE Gwalior bad ia kine ki lai ngut kiba la pass yn sa khot ia ki ban put refree ha kine ki por ban dang wan.
Kine kiba pass ia kane ka eksam refree ha ka kyrdan kaba san ka long ba la shah ia ki ban synrang ia ki refree ha ki jingialehkai kiba heh jong ka ri, katba ia ki ba pass ha ka bynta kaba 6 haduh 8 ki lah ban put tang ha ki jingialehkai ha ka jylla.
