Shillong, Risaw 27: Ki skul baroh khamtam ki skul ha sor ki dei ban bud nuksa ia ka shnong Mawlynnong ban bat bad niewkor ia ka jingkhuid ka jingsuba’, la kyntu u Rangbah shnong ka Mawlynnong u bah Moral Kharlymba ha ka jingiaphylliew wad jingtip bad ki khynnah skul klas IX ka KJP Girls’ Hr . Sec school, Shillong kiba ia shim bynta shit rhem ha ka 26 tarik Risaw 2019 ba la pynlong ha Dorbar hall, Mawlynnong.
Katkum ka jingpynshai ki nongpyniaid shnong, ka jingkhuid la sdang bad hikai lypa naduh na ing na sem sa bud sa ha shnong ha thaw ter ter. La hikai ia ki khynnah naduh na ing haduh skul ba wat lada ki rangbah ne nongwankai ki bret i kot ne snep chewing gum, ki khynnah rit kim ong ei ei hynrei ki tam ia ki hakhmat u nongbret ia i snep chewing gum.
La iathuh ba ka daw ka jingmih ka kyrteng Mawlynnong ka dei na ka jingdon jong ki mawlong ba thliew lynnong lynnong bad ki maw kiba don lynnong lynnong ki trai shnong hyndai ki khot mawlong lynnong’.
Hynrei namar ba ki nongwei kim lah kynnoh mawlong lynnong, ka wan noh ka kyrteng Mawlynnong ha ka jaka mawlong nong. Haba ki khynnah skul ki kylli ia ki nongpyniaid shnong shaei pat ki bret ia ki jaboh jabain jong ka shnong.
U Bah Rishot Khongthohrem uba la long u nongsain jong ka jingwan rah ia ka jinglehkhuid ha Mawlynnong u la ong ba ki nongshong shnong ka Mawlynnong ki lah tip bad nang lypa ban pyniakhlad hapdeng ki plastic bad ki jaboh ba pyut wat shwa ba ka Municipal kan leh ia kata.
Ia mynta hi ki jaka buh nuit ki dei ban don beit man la ka ing nalor kaba la shna na ka shnong. Ia ki jaboh bym pyut la bret ha ki jaka ba shna khnang da ka shnong katba kibym pyut pat la wan kit da ka Municipal naduh Shillong.
U Bah Rishot u la pynpaw ruh ba kane ka dei ka sien kaba nyngkong eh ha ka shnong Mawlynnong ba ki skul kin wan ban leh kum kane ka prokram kaba kham pher tam na baroh.
Kiwei kiwei ki skul kiba wan ki shu wan tang kum ki nongwankai ban peitkai ia ka shong. Katkum ka jingkhein ba la ioh, ki don baroh 105 tnum ing ha Mawlynnong, 3 tylli ki ingmane, 3 tylli ki skul, 2 ki primary bad kawei ka Upper primary, la ong u Rangbah shnong ka Mawlynnong, u bah Moral ha ka jingiasyllok bad ki khynnah skul na KJP, Shillong.
Ki nongshong shnong baroh ki don 543 ngut, 280 ki shynrang bad 263 ngut ki kynthei. Hynrei,kaba phylla bad lyngngoh pat ka long ba ka Health Dept kam pat buh satia kano kano ka Sub ne primary centre ha katei ka shnong namar ka jingkhuid bad ka koit ka khiah ki dei ban iaid lang ryngkat ryngkat.
Ki dkhot jong ka dorbar shnong ki kyntu ia ki khynnah skul ba kin shim khia ha ki skul jongki kum ka nongmuna ban pynlong ka jingkhuid ha skul jongki bad kylleng ruh ki skul ha ka jylla.
ka principal jong ka skul KJP, ka kong H M Marwein ka la pynpaw ka jingsngewnguh ia ka shnong Mawlynnong kaba la kloi ban pdiang bad shah sngewbha ban ai ki symboh jingtip ba kordor ia ki khynnah skul bad ka pynpaw ruh ban phah bud nuksa lem ia ki khynnah ha skul na ka bynta ka jingmyntoi ka skul.
Ka Principal kala la pynpaw ruh ba kane ka jingwan wad jingtip ne study tour trip jong ki khynnah ha katei ka sngi, ka long shisha ka jingmyntoi kaba khraw ba ki khynnah kin tip khambha ia ka Mawlynnong.
Ia ka jingialang iasyllok la pyniaid da u Babu Kular Khongjirem uwei na ki nonghikai ka skul KJP Shillong kum u nongpyniaid ha katei ka jingialang ha katei ka sngi. U Rangbah shnong jong ka shnong Nohwet, u bah Bosewell Khongthohrem ruh u ia don lang.
Ha kane ka sngi u la pyntip ba ka jingkieng jri ha Nohwet ka la don kumba 200 snem tam, bad ki riew hyndai ki dei kiba ieit bha ia ka mariang ban sumar bad pynneh pynsah bad u la kyntu ia ki khynnah skul ruh ba kin bud ia ki dienjat ki longshwa da kaba leh khuid ia ka mariang bad kiar na kino kino ki jingpynjaboh iaka.
NB: 1. Ki khynnah ka KJPGirls’ Hr. Sec School Shillong kiba iashon dur lang bad ki bor pyniaid shnong ka Mawlynnong, ki nonghikai.
- Ki khynnah skul ba dang iasyllok bad ki nongpyniaid shnong Mawlynnong.
- Ki nonghikai skul ka KJP Girls Hr. Secondary School, Shillong bad ki nongpyniaid shnong Mawlynnong.
- Uwei na ki maw ba la ioh kyrteng ia ka shnong Mawlynnong.
