Shillong, Rymphang 27: U MDC ba tang marwei jong ka Hills State People Democratic Party (HSPDP) na Mawshynrut u Bah Srally Rashir u la pynpaw ba u la dep kren lypa ba lada u jop ia ka election MDC un ym treh ban ia trei lang bad ka Voice of the People Party (VPP) hapoh KHADC.
U Bah Srally Rashir uba dei u MDC barim jong ka Mawthyngkut, mynta hadien 15 snem u la wan phai biang kum u MDC jong ka Mawshynrut constituency ban mih khmat sha KHADC.
Haba kren bad ki lad pathai khubor u Bah Srally Rashir u la ong ba hadien ba u la jop ia kane ka MDC election u khlem phah ktien sha ka VPP ban iatrei lang ha KHADC da kaba pyni ia ka daw ba kan shitom shibun ban ia trei lang bad VPP.
“Naduh ka por ialap election nga la dep ban kren lypa ba lada jop ngan ym treh ban ia trei lang bad ka VPP namar kan long kaba eh ban ia trei lang hapoh ka jingialam u President ba synshar donbor (dictator)” ong u Bah Rashir.
Shuh shuh u Bah Srally Rashir u la ong “ai lad kin synshar hi ma ki bad ki paidbah kin sa lap bad ki paidbah kin sa jubab hadien san snem” u la ong bad bynrap ba u hun ban shong ha ka liang pyrshah.
