Shillong, Jymmang 03: Pan jingpynshai ka kynhun Awaken India Movement (AIM) Meghalaya State Unit lyngba ka ophis treikam Directorate of School Education bad Literacy (DSEL) jongka Sorkar Jylla halor ka jingpynkylla ia ki Skul ai jinghikai namar ka jingnang jingstad sha ki Skul hikai sumar nongpang bad kumjuh halor ka jingpyntreikam ia u Aadhaar.
Ka kynhun jongka Awaken India Movement (AIM) kaba don hapoh ka Ri India baroh kawei ka la mih ban wanrah ia ka jingkyrsiew bad shemphang namar ka jingim ba bha jongbaroh kum ki Para bynriew ha sla pyrthei khamtam da kaba la mih paw ban iaid ha manla ki jong ki Jylla bapher paher jongka Ri India halor kiba bun ki bynta kiban ieng iada khamtam ha kaba iadei bad ka Pule Puthi lem bad ka Koit ka Khiah na bynta ka jingbha.
Ka kynhun Awaken India Movement (AIM) Meghalaya State Unit lem kumjuh ha ryngkatlang bad kiwei pat ki State Unit kiba don ha manla ki Jylla jongka Ri India kala ioh ban iakynduhlang hapoh ka Jylla Hyderabad ha kine ki Sngi ba la dep lyngba ka National Meeting Central Body jongbaroh kawei ka Ri India.
Ynda hadien ba la dep ban shim ia ki rai kiba bun ka la mih shakhmat ban kyrsiew da jingiatylli ha kaban ieng iada namar ki para bynriew halor ka jingshah pynbor ban ai DAWAI bad AADHAAR ynda hadien ba la iohi bad sakhi halor ka jingpyrshang jongka Sorkar Kmie kumjuh ki Sorkar Jylla bapher bapher.
Kata ka long ban wanrah ia ka pyntreikam bakla khlem da ailad halor ka Synshar Paidbah ha manla ki ïit ki Hima katkum la ki Shnong bapher bapher khamtam hapoh ka Jylla Meghalaya kaba dang la kijong ki Autonomous District Councils lem bad ba dang hap hapoh ka Minority Status jongka Riti Synshar Paidbah (Constitution) jongka Ri India.
Haba ioh ia ki jingpynsngew da ki Kmie ki Kpa jongki Khynnah Skul lyngba ki skul sorkar jongka Jylla ha kaba shah pynbor ban phah ia ki khun jongki ha kaban pyndep ia ki Blood test, weight bad height measurements lem kumjuh bad kiwei pat ki rukom ai jingsumar dawai halor kiba bun rukom khlem da don ka jingtip bad jingpynshai Paidbah khamtam lyngba ki Kmie ki Kpa kiba ri ba sumar ia la kijong ki khun.
Kane ka la kylla long ka lynti kaba wanrah ia ka jingbakla shikatdei eh halor ka longbriew manbriew ha sla pyrthei. Haba phai halor ka rukom jingiada khamtam ban pynbor khlem da ioh jingmynjur lyngba ki nongri nongsumar kalong kaei kaei ka bymlah ban pdiang lada pyrkhat halor ka hok bad jingshisha.
Ka kynhun Awaken India Movement (AIM) kaba don hapoh ka Jylla Meghalaya shuh shuh ruh kala pynpaw ia ka jingsngew artatien haba iohi ba ka la don ruh ka jingshah pynbor jongki Khynnah Skul ban pyndep ia u Aadhaar bad ynda haba la wat bniah la shem ba nakaliang jongka Supreme Court badon burom ka la ai ia ka rai kaba skhem ban pynpaw ba ymdei ban pyntreikam ia u Aadhaar hapoh ki jaka pule skul bad ymruh ban shim naduh kaba sdang ban pynrung skul ia ki khynnah pule.
Kumjuh haba phai sha u Education Minister jongka Sorkar India u Shri. Dharmendra Pradhan ula pynpaw ia kajuh ka phang ba ymdei ban pynbor ia ki khynnah pule ban leh Aadhaar bad kimdei ruh ban duh kino kino ki jingmyntoi haba kum ki khynnah skul kidei ban ioh. Kane kala long ka mat kaba hakhmat eh ha kaba bun nakaliang jongki MP Cabinet Minister kila pynpaw.
Ka AIM ka la pyrshang ban wat bad tihbniah halor kaei ka bynta kaba kongsan haduh ban wanrah ka jingkulmar ia ki khynnah skul khamtam na bynta ki kmie ki kpa jongki haduh ban pynlong kum ka jaka ai jingsumar ia ki Khyllung Khynnah hapoh ki Skul bapher bapher da kaba shim kum ia ki kum ki nongpang ha kum kitei ki bynta kiba khlem da ioh jingpynshai pura nalor ba ki Khynnah Skul kimdom kano kano ka jingpang hapoh ka met jongki.
Kum ki briew ngidei ban kyndit bynriew noh namar bunsien kiwei pat ki jait dawai bapher bapher halor kiba bun ki bynta kiba dei banrung shapoh ka met longbriew manbriew kidon ia ka jingktah (Side Infections) hapoh ka met, ha kaba ngi kum ki briew ngimlah ban tip pura ia kane. Ngimlah ruh ban tip shai balei kumta ka jia bad lada dei ba ki Doctor baroh ki hap ban pynshai lane ban iathuh ia kane nga ngeit ba yn ymdon ruh kiban leitshim dawai ne wat dih Dawai.
Nakaliang jongka AIM Meghalaya State Unit ka pan ia ka jingpynshai kaba pura lyngba ka Sorkar Jylla bad ngi hap ban buh ka jingkylli ba “Halor kaei kadaw bah kaba pynlong ia ki khynnah skul ba kinhap ban ai dawai haba leitskul da jingkoit jingkhiah” bad “Ka jingbuh ia ki Skul na bynta jongngi ki briew kalong ban leit pule na bynta ban ioh ia ka jingnang jingstad, ne la ka skul kadei ruh banlong kum ka Hospital kaban hap ban sumar Nongpang?”.
Ka AIM Meghalaya ynda haba ka la pyrshang ban leit iakynduh ia u Education Minister jongka Sorkar Jylla Meghalaya Shri. Rakkam A Sangma lem bad u Director jongka DSEL Shri. Swapnil Tembe, IAS, ym shym la ioh lad ban iakynduh bad khlem da pynslem la hap ban leit iakynduh ia u Joint Director jongka DSEL Bah L. Lyngdoh.
Kane ka jingleit kynduh ka long ban ai ia ka jingthoh bad ban pan ia ka jingpynshai kaba pura halor kine ki bynta kumba la shem bad iohi. Nakaliang jong u Joint Director u la pan por ban pynshai haduh ka taiew kaban sa wan halor kiba bun ki bynta jongkane ka bynta kaba wanrah ia ka jingsumar jingpang hapoh ki Skul bad ban phah wanrah Aadhaar ia ki Khynnah skul.
Ka AIM Meghalaya State Unit ka la phah da ka jingthoh shapoh ka Directorate of School Education & Literacy, Govt. of Meghalaya ban pynpaw halor kiba bun ki bynta ha kaba iadei bad ki Khyllung Khynnah kiba dei ban ioh ia ka jingpule kaba pura da kaba pynkulmar jingmut ha kaban wanrah noh sha ki jaka ai jingsumar bad kiwei kiwei.
Lada pyrkhat jylliew shuh shuh baroh la shim ba kane kalong ka bynta kaban wanrah ia ka jingialeh pyrshah namar ka imlang sahlang ia la kijong ki aiñ kiba don hapoh ka Ri India bad ka Jylla baroh kawei bad kumjuh halor ka jingim briew man la iwei pa iwei lada phai khamtam katkum ki khyrnit jong ka Hok ba dei ban ioh kum u ki nongshong shnong hapoh rit Synshar paidbah jongka Ri India .
Kumba la kdew shai katkum ki khyrnit ter ter naduh 14 haduh 22 bad kumjuh lada phai halor jongka Right of Children to Free and Compulsory Education (RTE) Act 2009, Human Rights Education with Children bad shuh shuh la sakhi ruh ba kine baroh kiba ka Sorkar ka ialam ban pyniaid bakla lada phai halor ki rai kiba nakaliang jongka Supreme Court ka la shim ban pynpaw paidbah, kane ka long katkum ka kyrwoh kaba la phah da u bah Banshai Marbaniang shongknor ka AIMha Meghalaya.
