Shillong, Jylliew 06: Ka jingialang jong ka Kabinet kaba la long mynta ka sngi ka la mynjur ban pynkylla thymmai noh ia ka Office Memorandum u snem 2022, kaba dei jong ka Reservation Roster haba pyntip ruh ba ka kam thungkam thungjam kan sa sdang noh hadien ka jingpynkylla ia ka Office Memorandum.
U Myntri Rangbah ka Jylla Conrad K Sangma u la pyntip hadien ka jingialang jong ka Kynhun Myntri, u ba la pyntip ruh ba ia ki jingai jingmut jong baroh ki Seng Sain Pyrthei la pynrung lang ha ka jingpynkylla ia ka Office Memorandum ba la pynmih ha u bnai Jymmang 2022.
Ka long kaba eh ia u ban batai ia baroh ki jingtip kiba iadei bad ka jingpynkylla thymmai ia ka Office Memorandum, la u Conrad u la ong. U Conrad ula pyntip ba ia kane ka jingpynkylla yn sa pyndep lehse lashai ka sngi ne la shisngi kaba mut ruh ba hadien kane, kan sa sdang noh ka kam iathung kam thungjam ha ka Jylla.
Da kine ki jingpynkylla ha ka Office Memorandum, ka kam ba iadei bad ka jingthungkam thungjam ruh kan sa sdang noh hadien ba la pynmih ia ka Office Memorandum ba thymmai, kaba lah ban long lashai ka sngi lane lashisngi” ong u Myntri Rangbah.
Lah ban kdew hangne ba ka Voice of the People Party (VPP) ka la dawa ia ka Sorkar Jylla ban pynsangeh shuwa ia baroh ki jingthungkam thungjam ha ki tnad Sorkar tad haduh ban da dep iatai halor ka Roster System bad ka jingbishar thymmai ia ka Job Reservation Policy.
Halor kane u Conrad ula ong “Ngim lah ban pynsangeh ia ka jingthungkam thungjam namar kan sa ktah ia ka rta jong ki samla kiba wad kam ha ki kam Sorkar”
Ka jingthungkam kam dei ban sangeh, la ong ba ngim lah ban pynsangeh ia ka jingthungkam namar bun na ki samla jong ngi kiba dei ban ioh kam bad kiba mut ban thep kam, kin sa kut noh ka rta thep kam.
Lada ngi pynslem, kin don bun ki ban shah ktah bad kumta ka jingthungkam ka dei ban iaid na ka bynta ka bha ka miat ki samla ba kin ioh kam, katba ka jingiatai bad jingshong bishar jong ki Committee ka dang iaid halor ka Reservation Policy la bad ka Roster ka dei ka kam ba iai bteng bad ka long kaba donkam ban tip hangno ngi don ha ka roster mynta.
U Myntri Rangbah ula ong ba u la dep kren naduh ka sngi ba nyngkong, ba ka Roster ka dei ka kam ba iai bteng, hooid, ka sdang naduh u snem 1972. Hynrei ka jingiaibteng ka don hangtei. Ngi la dep kren ruh ba ha kiba bun ki snem ba la leit noh, ki don bun ki kam kiba la dep ban pyndap da ki katto katne ki jaidbynriew, don kiba pyndap da kiwei pat ki Jaidbynriew ha ka bhah jong kiwei.
Hynrei, lada long kumno kumno ruh, kine ki kam ki dei kiba la dep thungbriew hynrei ka jingpynbeit ia ki jingkhein jingdiah jong ka Roster ka long kaba donkam khnang ba ngin lah ban tip hangno ngi don ha ka Roster mynta bad ha ka serial nombor aiu ba ngin sdang la ong u Conrad.
U Conrad u la ong ba Kane ka dei ka jingthmu ba hakhmat eh bad hadien kane, kan sa mih ka jingpynbna paidbah ia ka jinglait kam na kane ka serial nombor bad kane ka dei ka jingthmu ban pynbeit ia u nombor naduh u snem 1972 bad kano kano ka jingkhein jingdiah kaba ioh, yn sa sdang nangta bad ia kiba ym ioh, yn sa sdang naduh 1.
