Shillong, Lber 12: U National president ka party NPP u Conrad K.Sangma u ba dei ruh u myntri rangbah ka jylla Meghalaya mynta ka sngi u la leit jngoh ia ka ophis jong ka party kaba la shah thang ha ka 11/Lber /2026 lem bad kiwei ha ki jaka bapher bapher ka sor Tura.
Ia kane ka jingthang la leh da ki katto katne ngut bad kane kala wanrah ia ka jingsngewsih namar kam don kano kano ka daw ban pynjot pynpra ia ka ophis jong ka party namar ka jingiakhih la i kumba kala kylla ka mat iakren seng sain pyrthei bad ka ophis jong ka party kala kylla long ka sohpdung.
Lah ban ong ba ym pat ju iohi ia kum kane ka jingjia bad ia kito kiba leh ia kane ka kam ka ain kan sa leh ia kaba donkam. Ha kajuh ka por la phah ia ka khubor sha ki nongkyrshan jong ka party ba kito kiba thang ia ka ophis ki pyrkhat ba kila pynkut ia ka party NPP.
Hynrei baroh la ia tip ba ka party NPP kala long doh longsnam ha ka dohnud jong ki briew kumta kan nym don lynti ba kin pynduh ia ka NPP. Na ka liang ka party kan sa maramot ia ka ophis kaba la shah thang sha kaba kham bha ban pynpaw ia ka jingsngewnguh ia ki nongkyrshan ka party.
