Shillong,Iaiong 9: Ka MLA jong ka Ampati ka Miani D.Shira mynta ka sngi 9/Iaiong 2026 kala plie ia ka jingkieng Masanggre ia kaba la shna na ka Skhim Special Rural Work Programme bad ka jingbynrap lang na ka skhim MGNREGA ia kaba la plie paidbah ha ka jingialang kaba la long ha phyllaw iing skul Rongsang Abagre Adhoc School South west Garo Hills District.
Ha ka jingkren ka MLA kala ong ba kane ka jingkieng kan iarap ia ki paidbah nong shong shnong Mangsanggre bad ki shnong ba don marjan bad ka khamtam eh ban pynsuk ha ka leit ka wan ka kit ka bah bad kane kan pynkiew ia ka ioh ka kot katei ka thain.
Ka MLA kala ong ban shna ia kane ka jingkieng ka jinglut kala bun ha kaba ym lah shuh tang ha ka bor kum MLA hynrei la lah ban pyndep ia kane ka jingkieng da kaba pyniasnoh lang ba kiwei ki skhim ryngkat bad ka jingiatrei lang jong ka shnong.
Ha ka jingkren jong ka Anendya Raajsshre,IAS kala ai ka jingiaroh ia ka MLA kaba iohi ia ka jingdonkam jong u paidbah bad da ka jingiakyrshan lang na ka ophis jong ka Block Development Officer ryngkat ki paidbah nongshong shnong la lah ban pyndep ia kane ka jingkieng bad khmih lynti ba kum kine ki jingiatreilang kin dang iai bteng.
