Shillong, Naitung 11: Ha ka sngi kaba kongsan bha na ka bynta ka thain shateilammihngi, ka Myntri kam pla tyngka jong ka sorkarpdeng ka Nirmala Sitharaman ka la buh ia u mawnongrim na ka bynta ka Regional Campus kaba nyngkong eh jong ka Indian Institute of Corporate Affairs (IICA) ha Umsawli, Shillong.
Kane ka dei u mawmerba kongsan, ym tang ïa ka jylla Meghalaya hynreiïa ka thaiñshateilammihngi baroh kawei, namar ba ka kylla long kaba nyngkong eh ha ka ri ban pdiang ïa ka tnad jong kane ka jaka pule ba hakhmat eh kaba hap hapoh ka tnad Kam Kompeni.
Da kaba khot ia ka kum ka “sngi kaba phylla na ka bynta ka thain shateilammihngi,” ka Myntri kam pla tyngka ka la ong ba kane ka jingthmu kam dei tang ban pynlong ia ka jingialang hynrei ban wanrah ia kawei ka jaka pule sha kane ka thain kawei ka ban kyntiew ia ka jingpynroi ia ka bor jong ki kompeni, ka jingsynshar kaba bha, bad ka jingseng kam seng jam.
“Kane ka jaka pule ba pura kan long kum ka jaka pule ba kongsan ban ïarapïa ki nongseng kam seng jam, bad ki riewshemphang ban roi hapoh ka phang jong ka jingsynshar kaba don ka jingkitkhlieh,” ka la ong.
Ia ka jaka pule jong ka thain la thmu kum ka jingpynkylla ia ka bor jong ki kompeni, ka jingsynshar kaba bha, bad ka jingseng kam seng jam kaba neh ha ka thain shateilammihngi.
“Haba ki jaka treikam kum ka ICA ki wan shane, ka pyni ia ka jingkylla na ki phew snem jong ka jingbymshimkhia sha ka juk jong ka jingpyrkhat kaba thikna. Kane kam dei shaphang ka jingkynnohia kaba la leit noh—ka dei shaphang ka jingpdiang ia ka jingdonkam ia ki jingtei ba kongsan, ba la bud da ka jingkyrshan jong ki jaka treikam, kaba mynta ka la nang long ka jingshisha,” la ong ka Sitharaman.
Ka Sitharaman ka la pliepaidbah ruh ia ka IICA North East Conclave 2025- “Ideation to Incorporation” kaba la pynlong ha IIM Shillong. Kane ka jingïalang kaba ar sngi ka pynïasoh lang ïa ki nongshim bynta na ka sorkar, ki karkhana, ki jaka pule, bad ki start up ban ïakren halor ki mat ba kongsan kum ka jingbud ryntih, ka jingïoh pisa, ka jingpynpawnam, ki lad digital, bad ki jingpynpoimarbam.
Ka Myntri kam Pla Tyngka ka la pynpaw ba kane ka jingïalang ka pynpaw ïa ka jingthmu ba kham jylliew jong ka sorkar na ka bynta “Ka jingmut sha ka jingpyntreikam” ban pynthikna ba ki polisi bad ki jaka treikam kin ialam lynti ïa ki samla ba seng kam seng jam naduh ba sdang ïa ka jingmut jingpyrkhat jong ka kam lyngba ka jingpyntreikam kaba jop jong ka.
Haba pynpaw ia ka jinglong tynrai jong ki nongseng kam seng jam jong ka thain, ka Sitharaman ka la ong, “Ki startup ha ka thain shateilammihngi ki dang mih stet, ki pyniadeiialade bad ki jingdawa jong ka pyrthei. Ka long kaba kongsan ba ka polisi kan iaid ryngkat bad pynurlong ia kane ka kam.” Ka la ai ka jingïarohïa ka MCA bad ka Sorkar Jylla Meghalaya kiba la ïatreilang ban pynurlongïa kane ka jingthmu.
Ka myntri kam pla tyngka ka la kdew ruh ia ka jingdonkam ba kongsan jong ka thain shateilammihngi ha ka kam jong ka roi ka par jong ka ri. Da kaba sot ïa ka jingthmu jong u Myntri Rangbahduh shaphang ka “Ashta Lakshmi”, ka la rakhe ïa ka jingitynnad ka mariang, ka kolshor, ka jingdon ha ka jaka ba kongsan, bad ki briew jong ka thaiñ.
“Ka jingsngewrit, ka jinglong ba shisha bad ka jinglong tynrai jong ki briew hangne ki long shisha kiba kyrpang. Kane ka thain ka long kaba riewspah ym tang ha ki marpohkhyndew, hynrei ha ki jinglong kiba la synsharia ka imlang sahlang jong ka la bun spah snem — ki jinglong kiba nang kham iadei bad ka ioh ka kot jong kane ka juk.”
Katba ka dang ïarohïa ki sienjam ban pynkupbor ha ki kam digital kum ka GeM bad ka ONDC kiba ïarapïa ki mar tynrai ban shemïa ki iew ha kylleng ka ri India bad ha ka pyrthei, ka Sitharaman ka la ban jur ba ka jingpynpoi mar bad ka jingïoh lad ki dang long ki jingeh kiba kongsan.
“Kam pat biang ba ki mar kin long kiba lah ban iohi lyngba ki lad digital—ngi dei ban pynthikna ba kin poi sha ki iew kiba la thmu. Ka jinglumlang, ka jingbuh mar, bad ka jingkitjingbah ki dang long ki jingeh kiba donkam ban shimkhiakyrkieh.”
Ka la ai jingmut ban thaw ia ki jaka pynpoi mar ba iatrei lang ban pynsuk ia ka jingkit mar na ki jylla bapher bapher jong ka thain shateilammihngi sha ki iew jong ka ri bad ka pyrthei.
“Wat la ngi la poi sha ka jingbha, ka jingpynbeit ryntih, bad ka jingpynkhrehïa ka ïew, ki jingduna ha ka liang ka jingpynpoi mar ki buh jingma ban pynduhïa kine ki jingkiew shaphrang. Ngi dei ban weng ïa kane da kaba iatrei lang.”
Ha kaba pynkut, ka Myntri kam pla tyngka ka la pynsngew biang ïa ka jingkular jong ka Sorkar Pdeng ban wanrah ka roi ka par bad pynïasoh lang ïa ka thaiñshateilammihngi ha ka jingthmu jong ka India@2047.
Ka la pynksan ia ka jingdonkam ban pyrkhat biang ia ka roi ka par—ym tang kum ka jingpynbiang ia ki jingtei, hynrei kum ka rukom treikam kaba bniah, kaba la pyniaid da ki jingngeit kiba bha, bad kaba pynkupbor ia ka thain.
“Ka jaka pule jong ka IICA kam dei tang ka jaka pule—ka dei ka dak jong ka jingshaniah bad jingngeit jong ka Sorkar ha ka bor jong ka thaiñ,” ka la ong.
Ha kane ka sngi la don lang u Myntri Rangbah ka jylla u Conrad K. Sangma, u Chief Secretary ka jylla Dr. D.P. Wahlang, Secretary ka Tnad kam Kompeni ka Dipti Gaur Mukerjee, DG ka IICA G K Singh, Director ka IIM ka NaliniPrabhaTripathy, kiwei kiwei ki heh ophisar na ka tnad Kam Kompeni, ki nongmihkhmat na ki karkhana bad ki jaka pule, bad bun ki samla pule bad ki nongseng kam seng jam.
Haba kren ha kane ka sngi bad haba pyrkhat halor ki jingkylla kiba kongsan ha kane ka thaiñ ha kine ki snem ba la dep, u Myntri Rangbah ka Jylla Meghalaya u Conrad K Sangma, u la ong, “Naduh ba u Myntri Rangbahduh u la shimti ïa ka kam, ngi la ïohi ba ka thaiñ shatei lammihngi ka la kyllakhongpong pura.
Sa shisien, nga shim ia kane ka kabu ban ai khublei ia u Myntri Rangbahduh bad ia ka Myntri Pla tyngka na ka bynta ka jingkyrshan bad ki kam kiba la iarap ban wanrah ia ka thain shateilammihngi ha ka kyrdan kaba iaryngkat—bad ha ki katto katne ki bynta, watshakhmat ruh—khnang ba ngin lah ban trei ym tang bad kiwei pat hapoh ka ri hynrei bad ka pyrthei ruh.”
U Myntri Rangbah ka Jylla u la ïarohïa ka IICA Regional Campus kum u mawmerba kongsan, katba u la ban jur ruh ba ka jingkongsan ba shisha jong ka kam shong tang ha ki jingtei hynrei ha ki jingbha kiba kan wanrah.
“Kane ka dei ka sienjam kaba heh, hynrei kumba nga la ong mynshwa, ka don ki lad. Kane ka jaka pule kam dei ban long tang ka jingtei. Ka dei ban long ka jaka pdeng jong ka jingïadei kaba don jingmut, kaba pynïaidïa ka jinglong ba tbit, ka jingpynwandur thymmai, bad ka jingïatreilang ha ki kam bapher bapher.”
U la ong ba watla bun ki seng ki lah ban ai jinghikai, ka jingpynïapher jong ka IICA ka dei ban long ka jinglah jong ka ban pynïasoh bad ki paralok ha ka pyrthei, ban ïatreilang bad ki tnad treikam jong ka Sorkar pdeng, bad ban kyntiew ïa ka pateng ba thymmai jong ki riewshemphang kiba don ïa ka jingïohijngai kaba iahap bad ka pyrthei.
Ha kaba pynkut, u la kyntu ia baroh ki nongshim bynta ban iatrei lang ha kaba pyndonkam ia ka bor kaba pura jong ka jaka pule ba thymmai:
“Ka nongrim ka la seng, ka lad ka don hakhmat jong ngi. Mynta ka dei ka kamram jong ngi ban pynthikna ba ka ICA Regional Campus kan long ka dak jong ka jingtbit—ym tang na ka bynta ka Jylla Meghalaya bad ka thaiñshateilammihngi, hynrei na ka bynta ka ri baroh kawei.”
Ban pynsuk ia ka jingkyntiew ia ka bor, ka jinghikai halor ka jingbud ryntih, ka jingpynmih ia ki kyndon, bad ka jingiatreilang ban iasam jingtip ha ka thain, ka IICA ka la iasoi ruh ia ki hynriew tylli ki MoU ba kongsan bad ka Meghalaya Administrative Training Institute (MATI), ka Indian Institute of Management (IIM), Shillong, Software Technology Parks of India (STPI), Institute of Chartered Accountants of India (ICAI), Institute of Company Secretaries of India (ICSI), Institute of Cost Accountants of India (ICMAI) bad kaNational Law University & Judicial Academy, Assam.
