Shillong, Kyllalyngkot 23: U Myntri Sorkar Pdeng ba dei khmih ia ki tnad Fisheries, Animal Husbandry, bad Dairying &Panchayati Raj, Rajiv Ranjan Singh ba tip kyrteng ruh kum u Lalan Singh u la plié paidbah ia ka “Conclave on Dialogue for Holistic Development of Livestock Sectors in the North-East Region” kaba la pynlong hanongbah Shillong ha ka 23 tarik u Kyllalyngkot, 2025.
Ha kane ka prokram la wan iashim bynta lang da u Myntri khynnah, George Kurian, ka tnad Fisheries, Animal Husbandry, bad Dairying, ha ka jingiadon lang ki Myntri Animal Husbandry bad Veterinary Services na ki jylla ka thain shateilammihngi, ki ophisar, ki nongmihkhmat na kane ka kam, ki nongseng kam lajong, ki nongwad bniah bad kiwei kiwei.
U Myntri Sorkar Pdeng, Rajiv Ranjan Singh u la pyllait paidbah katto katne ki projek ba heh ha kane ka conclave. Kine ki kynthup 15 tylli ki Entrepreneurship Development Project (EDP) hapoh ka National Livestock Mission (NLM), kiba kot sha ka T 10.93 klur, bad ka jingsdang ia saw tylli ki Fodder Farmer Producer Organization (FPO) ba la plié lad da ka National Dairy Development Board (NDDB).
Shuh shuh, la pynbna ba yn sdang ia ka Regional Semen Production Laboratory bad Goat Semen Bank ha Khanapara hapoh ka NLM, lyngba ka jingbei tyngka kaba T 337.29 lak.
U Singh u la ong ruh ba ka NDDB kan sdang ia ka khanasamari ha ki shnong ban plié lad ia ka jingsdang ia ki multipurpose dairy cooperative society ha Arunachal Pradesh, da kaba peit bniah ia ka Namsai, Lohit, bad Lower Dibang Valley. Shuh shuh, la pynbna ba ka NDDB kan iatrei lang bad ka Assam, Arunachal Pradesh bad Tripura ha ryngkat kiwei kiwei ki jylla, ban sdang ia ki dairy cooperative.
Na ka bynta ka Meghalaya, u la plié paidbah ia ka Intensive Cattle Development Project ha Khliehtyrshi, Meghalaya, lyngba ka jingbei tyngka kaba T 31.86 lak, bad ka Multiplier Pig Farm ha Kyrdemkulai, Ri Bhoi District, ha ka jinglut jingsep kaba T 10.23 klur.
Shuh shuh, la pyllait paidbah ia ka jingrwai ri syiarha ka ktien Khasi kaba tip kyrteng kum ka “Ka Kam Ri Syiar, Kyntiew Ka Ioh Ka Kot,” ban kyntiew ia ka kam ri syiar ha ka thain, ha ryngkat ka jingpyllaitpaidbah ia ka Meghalaya Animal Administrative Report 2023-2024.
Kane ka conclave ka la ban jur ruh halor ka jingsdangia ka prokram ban kyntiew bad pynneh ia ki masiSiri Sikkim, lyngba ka jingkyrshan pisa na ka jingbei tyngka kaba T 215.6 lak. La sdang ia ka Regional AI Training Centre ha Gangtok hapoh ka RashtriyaGokul Mission (RGM) ha ka jinglut jingsep kaba T 450 lak.
Kane ka prokram ka la pyni ia ki rukom ri sniang kiba seisoh na ki nongseng kam lajong ha Assam bad ka la don ruh ka jingplie paidbah ia ka AI Training Centre kaba peit bniah ia ki sniang ha ka Central Livestock Farm ha Debipur, Tripura, kaba don ka jingmang tyngka kaba T 84 lak.
Ha ka jingpyrshang ban pynthikna ka jingioh symbai kaba kham bha ia ki nongrijingri, 15 ngut ki nongtrei MAITRI ha Gangtok ki dei kiba la ioh jingiarap hapoh ka RGM.
Shuh shuh, la soi ia ka Memorandum of Understanding (MoU) bad ka Transforming Rural India Foundation (TRIF) bad ka Sorkar Assam ban kyntiew ia ki prokram ai jingtip bad ban ai jingiarap ha ki kam teknikal.
La soi sa kawei ka MoU ban aiti ia ka Milk Processing Plant kaba don ha Ghungoor, Silchar, Assam, kaba plié lad da ka tnad Dairy Development, Sorkar Assam.
U Rajiv Ranjan Singh u la pyntip ba hapoh ka National Programme for Dairy Development (NPDD) bad ka jingkyrshan na ka bynta ki jingdon jingem, 29 tylli ki projek ki dei kiba la ioh jingmynjur ha ryngkat ka jingbei tyngka kaba T 240 klur na ka bynta kumba 53 tylli ki distrik na baroh 131 tylli ki distrik ha ka thain shateilammihngi.
Ka tnad ka thmu ban ai jingiarap pisa kaba T 250 klur ban kyntiew ia ki jingdon jingem kiba iadei bad ka kam dud, kyntiew ia ka bor ban thied ia ka dud na ka 1.5 laklitar ha ka shi sngi sha ka 3.5 laklitar ha ka shi sngi, bad ban pynrung kyrteng 70,000 ngut ki nongrijingri ba thymmai ha kane ka rynsan cooperative.
U la bataiia ki jingeh ba ka kam ri jingri bad ri syiar ka iakynduh mynta ha ka thain shateilammihngi, ba donkam ban pynkhlain, dei ban wanrah lang ia ki karkhana shimet ban wanrah ia ki jingdon jingem ba biang, bad ki kam ba iadei bad ka teknoloji lyngba ka jingkyrshan jong ka sorkarpdeng bad sorkar jylla.
Ha ka jingialang, la tyrwa ka jingthmu kaba T. 700 klur na ki kompani bapher bapher kum ka IB group kaba thmu ban bei tyngka kumba T. 200 klur ha ka thain shateilammihngi na ka bynta ka kam ri syiar bad ki jingbam. Kumjuh ruh ka Karnataka Poultry Federation ka la pyni ka jingthmu ban bei tyngka T. 250 klur ha ka thain shateilammihngi ban kyntiew ia ka jingkiew shaphrang kaba iaineh ha ka kam ri syiar.
Ka National Egg Coordination Committee (NECC) ka la kdew ba kin sa sam ia ki Egg Cart ban plie lad ioh kam, bad jingpyntbit treikam bad kyntiew ka jingbam ia ki pylleng ha ki jylla. U Myntri u la ban jur ia ka kam ri sniang ha ka thain shateilammihngi bad ong ba 42.4 lak ka jingdon ki sniang (46.42% jong baroh ba don ha India), ka shongdor kumba T. 5,000 klur kaba long kum ka nong nohsynniang kaba heh ha ka ioh ka kot jong ka thain.
U la pynshlur ia ka rukom treikam cluster bad rukom treikam public-private partnership (PPP) ban kyntiew ia ka kam sha ka jaka pdeng jong ka jingshalan shabar ri.
La ban jur halor ki kabu ba don ha ka kam ri syiar, da ka jingphaikhmat ban weng ia ki jaka ba suda hapdeng ka jingdawa bad jingpynpoi mar bad khring ia ki jingbei tyngka jong ki kompani shimet lyngba ki rukom treikam PPP, ki iew kiba ryntih bad ki rukom treikam cluster. U Myntri u la kren shaphang ka jingkongsan ka NLM Entrepreneurship Development Programme ha kaba 245 tylli ki projek ki la ioh jingmynjur ha ka thain shateilammihngi, ba kynthup 184 na ka bynta ka kam ri sniang, 45 na ka bynta ka kam ri blang, bad 16 na ka bynta ka kam ri syiar.
U la batai ruh shaphang ka prokram ai dawai tika da kaba ong ba ka jingai dawai tika FMD Round IV, ka kynthup 74.95 lak ki masi bad 86% la lah ban pyndep bad la sdang ia ka jingai dawai tika Round I jong ka CSF ha Mizoram, bad la pyndep ka jingai tika 18.10 lak ha ka thain shateilammihngi. Hapoh ka skhim MVU, 295 tylli ki unit ki la treikam ha ka thain, kaba pynthikna ka jingioh jingsumar ba bha ha ki tyngkong iing.
U Rajiv Ranjan Singh u la ong ba ki jinglong jingman bad ka suin bneng jong ka thain shateilammihngikilong kiba kham pher bad buh jingeh ia ka kam ri jingri, khamtam ka kam ri sniang, syiar, bad ki jingbam.
U la pynpaw ka jingsngewkhia jong u halor ka per capita average kaba duna ha kaba iadei bad ka dud bad ki pylleng haba ianujor bad ka jinglong jingman ha ka ri bad ong ba ka thain shateilammihngikadei ban shim ia ki sienjam ban kot sha ka jinglah kyrshan dalade.
U la kyntu ia ki sorkar jylla jong ka thain shateilammihngi ban plie ka single window ban pynsuk ia ka jingbei tyngka ki kompani shimet bad pynkhlain ia ka kam ri jingri. U la ai khubleiia ka sorkar Meghalaya, bad kito kiba don bynta ban pynlong ia kane ka jingialang.
U la ban biang ia ka thong Atmanirbhar Bharat jong u Myntri Rangbah duh Narendra Modi bad ban jur ia ka thong Astalaxsmina ka bynta ka thain shateilammihngi, bad kyntu ia kito kiba don bynta ha ka kam ban trei borbah na ka bynta ka jingkiew shaphang ka kam bad ka jingseisoh jong ka ri.
Ha kane ka jingialang la don ruh ki jingialang teknikal halor ka kam ri sniang, ri syiar, bad ka kam pynmih ia ki jingbam na ka bynta ki jingri, lem bad ka Industry-Government Dialogue halor ka jingplie ki lad bei tyngka ha ka kam ri jingri. Kito kiba iadon bynta ha kine ki kam ki la iakren shaphang ka jingpynbeit ia ka jingduna ha ka jingpynbiang mar, ka jingkyntiew ia ki jingsaindur thymmai bad ka jingkyntiew ia ki kam ha ka thain.
U A T Mondal, Myntri Tnad Community & Rural Development, Power & Taxation, Sorkar Meghalaya u la mihkhmat ia u Myntri Rangbah ka jylla Meghalaya, bad la ong ba ka jylla Meghalaya ka don ka jinglong jingman kaba kyrpang jong ka mariang, hynrei ka don bun ki lad na ka bynta ka jingkyntiew ia ka kam ri jingri.
U la ong ba ka kam rijingri kalong ka kam ba kongsan ha kine ki por bad u la pyntip ba ka jylla ka la pynkhreh ia ka kam kaba 10 snem na ka bynta ka jingkyntiew ia ka kam ri jingri ha ka jylla. Ha ka jingai jingkren jong ka, ka AlkaUpadhyaya, Secretary, DAHD, ka la ban jur ia ka jingkongsan ka kam ri jingri ha ka ioh ka kot kum ka kam thymmai ha ka ri bad ha ka thain shateilammihngi, da kaba ban jur ia ka jingkongsan ki jingpyniasoh ia ki iew, ka jingkyntiew ia ki jingdon jingem, bad ka rukom treikam kaba don nongrim ha ka data ban pynkylla ia ka thain kum ka nuksa jong ka jingkiew shaphrang ka kam ri jingri.
U C. Lalsawivunga, Myntri (AH&V), Mizoram, u Sudhanshu Das, Myntri (ARD), Tripura, u Bah Alexander L Hek, Myntri (AHV&DD), Meghalaya, Chief Secretary Meghalaya ki la iadonlang ha kane ka jingialang.
Ka jingialang ka la kyntiew ia ka jingiatreilang hapdeng ki nongthaw polisi, ki scientist, bad ki nongialam jong ki karkhana, kaba plie lad ia ka jingkiew ka jingkylla ha ka kam ri jingri jong ka thain shateilammihngi.
