Shillong, Lber 31: U myntri rangbah ka jylla u Conrad K. Sangma mynta ka sngi 31/Lber/2026 u la plie paidbah ia ka jingpyntreikam kaba la tip kum ka ‘Mission 1000 Days’ ha ka jingialang paidbah kaba la long ha State Convention Centre ka jingthmu jong kane ka long ban pynioh ia ka bam kaba tei met na ka bynta ki khynnah kynthei.
U myntri rangbah u la ong ba ha kane ka skhim yn ai ka jingkyrshan ia ki longkmie naduh ba ki dang sdang ban pun bad ka jingpyntrei kam ia kane ka skhim ka long da ka jingiatrei lang jong bun tylli ki tnad sorkar ka ban lam khmat da ka Meghalaya Human Development Council ha kaba ka tnad Social Welfare, ka tnad ka koit ka khiah,ka tnad pynroi nongkyndong, ka tnad pule puthi bad ka tnad pynkhreh kam kin ia don lang.
U myntri rangbah u la ong ha ka por ba ki wan ban shimti ia ka sorkar ha u 2018 kum ka sorkar ka don ka jingsngewkhia kaba jur namar ka jyllei bha ka jingkhlad ki kmie ha ka por ba yn kha ia i khun naduh katei ka por ka sorkar kala rai ba kumno ban ialeh ban pynduna ia ki jingduhei ki mynsiem jong ki kmie ha ka por ba kin leit kha ia i khun.
Da kaba shim nuksa na ki jingjia kiba la dep ka sorkar ka sngewthuh ba hap ban leh eiei ban pynduh ia kane ka jingjia kaba sngewsih bad ha kine ki lai snem namar ka jingshim ka sorkar ia ki lad ki lynti kane ka jingkhlad ki longkmie ha ka por ba kha khyllung kala hiar da 50 %.
U myntri rangbah u la kren ba na ka daw ka jingduna ka ioh ka kot khamtam ha ki nongkyndong ki longkmie kim banse ban leit trei tang hadien khyndiat por ba kila ioh khyllung namar ba ban ka jingkyrduh bad ba kim don lad da kum wei pat.
Ha kane ka sngi la pynbna ba na ka bynta kane ka phang trei kam kaba 1000 sngi ka sorkar kala mang pisa T.127 klur ban ai ka jingkyrshan ia ki longkmie da ka pisa ki jingbam tei met na ka bynta ka kmie bad i khun ba dang kha bad sorkar katba dang iaid ki sngi ba pyntreikam ia kane la ki lap ba kan don ka jingdkoh hangne hangtai ka sorkar kan dang pynbha shuh shuh lyngba ka jingai jingmut ki Paidbah.
