Shillong, Lber 23: Mynta ka sngi u myntri ba dei peit ia ka tnad pule puthi ka jylla u bah Lahkmen Rymbui u la plie paidbah ia ka iing skul kaba thymmai ha Mawmihthed RMSA Secondary School, Sohra ha East Khasi Hills District.
Haba kren ha kane ka jingialang u myntri u la ong ba u dap da ka jingkmen ban iohi ba ia ka iing skul la lah ban pyndep ha ka por kaba biang namar ka sorkar kala kut jingmut ban ai ia ka jinghikai ha ka pule puthi kaba biang.
U myntri u la ban jur ba ka jingleh ban ai ia ki iing skul kiba kham bha kan iarap ruh ia ki khynnah skul ba kin dang leh bha ha ka jingpule ka jong ki, nalor ka jingdon kam ia ki jingpule u myntri u la kyntu ia ki samla pule ba kin ia shim bynta ha kiwei kiwei ki bynta kiba ka skul ka pynlong.
U myntri u la ong ba lyngba kane ka skhim Samagra Shiksha ka long ban pynioh ia ki iing skul kiba thymmai bad ki jaka pule kiba biang kane ka long ka jingeh kaba ka jylla ka ia kynduh hynrei ka sorkar kala kut jingmut ban pynioh ia ki jaka pule kiba biang.
Ha ka jingkren u MLA kane ka jaka u bah Gavin M. Mylliem MLA u la kyntu ia ki paidbah ban don ka jingiatreilang bad ki paidbah ban kyntiew ia ka pule puthi, na ka liang jong u MDC u bah Titosstarwell Chyne u la ong ba u ai ka jingiaroh ia ka tnad pule kaba la lah ban pynioh ia kane ka iing skul kaba thymmai.
Ha kane ka sngi la don lang ki ophisar na ka tand pule puthi ka sorkar jylla bad ia ka sngi la pynphuh pynphing da ki jingialehkai bad ki jingrwai na ki khynnah pule jong kane ka skul ha ka jingiadon lang ki pyniaid skul bad ki kmie ki kpa.
