Guwahati, Lber 14: U Myntri Rangbah Duh, Narendra Modi u la aiti sha ka ri ia ka elevated road corridor kaba pyniasoh ia ka Pandu Port ha Guwahati sha ka Surok Bah NH-27, bad u la buh ia u maw nongrim na ka bynta ka Cruise Terminal ha Biswanath Ghat bad u la pyndep ia ka Bhoomi Pujan na ka bynta ka Regional Centre of Excellence (RCoE) ha Bogibeel, Dibrugarh, bad ka Cruise Terminal ha Neamati.
Kine ki saw tylli ki projek ki dei ka dak jong ka jingbei tyngka kaba ₹526 klur ban kyntiew ia ki jingdon jingem ha ki lad ka leit ka wan lyngba ki jaka shong um ha ka wah Brahmaputra (NW-2), namar kine ki ar tylli ki projek ki dei kiba pyntreikam da ka Inland Waterways Authority of India (IWAI) hapoh ka tnat Ports, Shipping and Waterways (MoPSW).
U Myntri Rangbahduh u la pynbna ba ka jingtrei ban tei ïa ki cruise terminal kiba katkum ka juk mynta ha ka Neamati Ghat bad Biswanath Ghat ruh ka la sdang naduh ka sngi Thohdieng. U Myntri Rangbahduh Modi u la ban jur ba kane kam dei tang ka projek na ka bynta ka roi ka par , ka dei ka sienjam kaba ai ka lynti ba thymmai ïa ka kam jngohkai pyrthei bad ka ïoh ka kot ha ka thaiñ ha Assam.
U myntri rangbahduh u la pynpaw ba kane ka sorkar kaba mynta kam shym la pynsahkut ia ka kam jngohkai pyrthei tang ban leit peitkai hynrei ka la shim ia ka kum ka lad kaba khraw ban ioh kam ioh jam bad ban kiew shaphrang.
U Myntri Rangbahduh Modi u la ong ba da kane ka jingthmu hi, la nang pyniar ia ki lad ki lynti jong ka kam jngohkai pyrthei ha ka wah Brahmaputra. U Myntri Rangbahduh u la pynpaw ba ynda la shna ïa ki cruise terminal, ki kam pynïaid lieng ha ka wah Brahmaputra kan nang kiew shakhmat, bad kan kham suk shuh shuh ïa ki nongjngohkai pyrthei na India bad na kylleng ka pyrthei ban poi sha Assam.
U Myntri Rangbahduh Modi u la pynpaw ba katba nang kiew ka kam jngohkai pyrthei da ki lieng, yn thaw ïa ki lad kamai thymmai na ka bynta ki samla trai ri, ki nongtrei kti bad ki nongtrei kti kin shem ïa ki iew kiba thymmai, bad ka jingïoh jong ki nongdie dukan rit, ki nongpyniaid ia ki lieng, bad ki briew kiba ïadei bad ki hotel bad ki kali ruh kan nang kiew.
“Ka kam jngohkai pyrthei ha Assam kam dei shuh tang ha ka jingleit jingwan bad ka jingleit jngohkai pyrthei, ka kylla long ka kor ba thymmai jong ka roi ka par bad ka bha ka miat jong ki paidbah,” la ong u Myntri Rangbahduh Modi.
Ia kane ka prokram la pynlong ha Jyoti-Bishnu Auditorium, Guwahati, ha ka jingiadon lang u Lat ka jylla Assam u Lakshman Prasad Acharya, u myntri rangbah ka jylla u Dr Himanta Biswa Sarma bad u myntri ka tnad Ports, Shipping and Waterways Sarbananda Sonowal ha ryngkat kiwei kiwei ki kynrem ki lyndan.
U Myntri Rangbahduh Modi u la ithuh ia ka bor kaba khraw jong ki lynti lyngba ki jaka shong um hapoh ri kum ka lad ka bym ktah ia ka mariang bad kaba pynduna ia ka jinglut na ka bynta ka jingkit ia ki nongleit nongwan bad ki mar.
Hapoh ka jingïalam jong u, ka bynta ba thymmai jong ka jingïadei bad ka roi ka par ka la wan dur ha kylleng ki jylla jong ka thain shatei lammihngi lyngba ki terminal, jetty bad ki jingdon jingem kiba iadei bad ki lad ka leit ka wan lyngba ki jaka shong um kiba pynkylla ïa ki lad kamai ja kpoh bad pynskhem ia ka Act East Policy jong ka India.
U Myntri Rangbahduh u la ong ba ka Assam mynta ka dang paw kum ka nuksa na ka bynta ka lawei ba thymmai jong ka thain shatei lammihngi jong ka Ri India kata ka Ashtalakshmi. U Myntri Rangbahduh Modi u la ong ba ka jingkiew jong ka Assam ka ai bor thymmai ia ka thain mihngi baroh kawei. Haba kyntu ïa uwei pa uwei u samla bad ïa kawei pa kawei ka longïing, u Myntri Rangbahduh Modi u la ong, “Ngi dei ban ïatreilang na ka bynta ka Viksit Assam khnang ba ka Assam kan long kum ka nuksa ha ka ri.”
U Myntri Rangbahduh u la pynpaw ka jingsngewnguh ba u la ïoh ban don ha ka jaka kyntang jong ka Maa Kamakhya ha ka sngi shuwa jong ka Navratri. “Nga la ioh jingkyrkhu da ka kabu ban ioh ia ka darshan jong phi ha kane ka jaka kaba kyntang jong ka Maa Kamakhya, tang shu sdang ka Navratri,” la ong u Myntri Rangbahduh Modi.
U Sarbananda Sonowal u la ong ba ki projek ba la plie paidbah bad sdang ki dei ka jingpynpaw ïa ka jingangnud jong u Myntri Rangbahduh ka ri u Modi na ka bynta ka thain shatei lammihngi kaba la roi bad kaba ïasoh lang.
U Myntri Rangbahduh Modi ji u la leh ia kaei kaba ki phew snem jong ka jingsynshar kim lah ban leh, u la pynkylla ia ka thain shatei lammihngi na ka thain kaba don ka lad sha ka thain kaba don ka jingkiew shaphrang. Ka Brahmaputra kam dei shuh tang ka wah. Hapoh ka jingialam jong u, ka la kylla long ka lynti bah jong ka lad na ka bynta ki million ngut ki briew.
Lyngba ka jingialam ba shemphang jong u, ki lad ka leit ka wan lyngba ki jaka shong um ki dang kylla sha ka lad kaba iahap tam bad ka mariang bad ka ioh ka kot. Ka jingpynkhlain ia ki ka la buh ia ka lynti jong ka jingkylla jong ka kam pynpoi mar jong ka India kaba plie lad ia ki lad ki lynti kiba thymmai ban kiew shaphrang.
Ka elevated road corridor kaba pyniasoh ia ka Pandu Port Complex bad ka NH-27, ia kaba la tei da ka jingbei tyngka kaba T180 klur, ka pynbiang ia ka bynta kaba sah hapdeng kawei na ki river terminal ba kongsan jong ka NW-2 bad ka rynsan jong ki surok bah. La shna ia ka ban iaid lait ia ka jingkhapniah jong ka Guwahati bad kane ka corridor ka pynbiang ia ka lad kaba suk ban poi sha ka Pandu Port, kaba kyntiew ia ka lad ban treikam bad ka jingpyniasoh jong ka port kaba pynduna bha ia ka jinglut jingsep ha ka jingkit mar.
Ka Cruise Terminal ha Biswanath Ghat, ia kaba la buh maw nongrim ha ka sngi thohdieng, ka dei shi bynta jong ka jingpyrshang ban tei ia ki jingdon jingem kiba katkum ka juk mynta ha ki kam cruise ha ka Brahmaputra (NW-2). Kane ka terminal kan kyntiew ia ki jingshakri na ka bynta ki nongleit nongwan, kyrshan ia ki kam cruise ha ka wah bad plie ia ki lad kamai ja kpoh ba thymmai ha ka kam jngoh kai, ka kam sah briew bad ka jingdie ia ki mar ba shna da ka kti.
Ka Regional Centre of Excellence (RCoE) ha Bogibeel ha Dibrugarh, ia kaba la leh ia ka Bhoomi Pujan, ka dei kaba dang tei da ka jingbei tyngka kaba T 188 klur. Kane ka dei ka maritime skill development hub kaba nyngkong ha ka thain shatei lammihngi bad ka RCoE kan ai jinghikai ia palat 5,000 ngut ki samla pule ha ka shi snem ban pyniaid ia ki lieng, ka rukom pyndonkam ia ki lad ka leit ka wan bad ka jingpynbiang mar lyngba ki jaka shong um.
Kan don ruh ia ki jingdon jingem na ka bynta ki jinghikai, ka ban pynbiang ia ki briew kiba la tbit ha ka kam kiba long kiba ddonkam bha ha ka kam jong ka India kaba iadei bad ki lad ka leit ka wan lyngba ki jaka shong um.
Ka Cruise Terminal ha Neamati, kaba la sdang da ka Bhoomi Pujan ha ka sngi thohdieng, kan pynkhlain ia ka kam jngoh kai da ki lieng bad ka jinglong ryntih ka leit ka wan jong ki briew ha ka NW-2, kaba kyntiew ia ki jingdon jingem na ka bynta ki nongjngoh kai pyrthei bad ki shnong kiba don ha ka rud wah Brahmaputra. Kine ki cruise terminal project ha Biswanath Ghat bad Neamati ki don ka jingbei tyngka kaba T 158 klur.
“Kine ki projek kiba shongdor da ki hajar klur ki thaw ïa ki lad ïoh kam ïoh jam kiba thymmai na ka bynta ki samla jong ka Assam bad ki kyntiew ïa ka roi ka par jong ka jylla,” la ong u Myntri Rangbahduh Modi. U Myntri Rangbahduh u la pynpaw ba ha kine ki shiphew snem ba la dep, ka sorkar kaba mynta ka la shim ïa ka sienjam kaba khraw bha na ka bynta ka jinglah ban shaniah ha lade.
Ka wah Brahmaputra naduh mynshuwa ka long u budlum jong ka thaiñ shatei lammihngi hynrei ngim shym la pyndonkam shisha ïa ka bor jong ka kum ka kor jong ka roi ka par. U Myntri Rangbahduh jong ngi u Modi ji u la pynkylla ïa kata. Ki lynti lyngba ki jaka shong um ki ai jingmyntoi ïa ki nongrep, ki nongkhaïi bad ki nongshna tiar ha kylleng ka thaiñ shatei lammihngi.
Ki cruise terminal kiba dang wan ha Biswanath Ghat bad Neamati kin trei kum ki jaka kamai thymmai ban pynriewspah ïa ki hajar tylli ki longïing ha shilynter ka wah. Da ki hajar ngut ki samla jong ngi mynta kin lah ban pynkhreh ïalade ban long shi bynta jong ka kam khaïi lyngba ki duriaw kaba dang wan bad kaba dang kiew bha hapoh ka Act East Policy jong u Modiji, ka wah Brahmaputra ka la kylla long ka lynti kaba la pynkupbor kaba pynïasoh ïa ka Assam bad ka thaiñ Southeast Asia lyngba ka rukom kit mar kaba khuid, kaba ai bynta lang ia baroh bad kaba iaineh, la ong u Sarbananda Sonowal.
Kine ki saw tylli ki projek ki dei kiba la pynkhreh ban kyntiew ia ka kam khaii pateng, ka kam jngoh kai, ka jingkyntiew ia ki sap, ka jingpynmih lad ioh kam, ka jingpynduna ia ka jinglut jingsep ha ka kam pynbiang mar bad ka jingplie lad ia ka jingpyniasoh bad ka pyrthei lyngba ka National Waterway-2, kaba kyntiew ia ka jingthmu jong ka Sorkar India ban kyntiew ia ka Brahmaputra kum ka lad ban wanrah jingkylla bad ka lad na ka bynta ka kam jngoh kai jong ka Assam bad ka thain shatei lammihngi.
