Shillong, Rymphang 21: Ka tnat District Council Affairs ka Sorkar Jylla ka la pynbna ban pynlong biang ia ka jingthep Vote MDC haki 4 tylli ki Polling Staion ha ka thaiñ East Jaintia Hills.
Ki 4 tylli ki jaka thep Vote (Polling Station) baka tnat DCA ka la pynbna ban thep Vote biang naduh ka 7 baje mynstep jong ka 22 tarik mynta u bnai ki kynthup ha 7 Wapung (Male) bad 8 Wapung (Female) kiba hap hapoh ka 22 Musniang-Rangad constituency bad ha 7 Bataw A (Male) bad 8 Bataw B (Female) jong ka 29 Bataw-Lakadong constituency kiba hap hapoh ka East Jaintia Hills District.
Kane ka wan hadien ba la mih ka jingkulmar ha ki 4 tylli ki Polling Station ha kaba la ioh jingtip ba ki briew bym ithuh durkhmat ki la rung jubor ha kamram thep Vote bad kila pynpait ia ki kor thep Vote lane ki EVM Machine.
Lah ban kdew ba ka ilekshon jied MDC thymmai sha Khasi Hills Autonomous Council (KHADC) bad Jaintia Hills Autonomous Council (JHADC) ka la long naduh 7 baje mynstep haduh 4 baje janmiet jong ka 21 tarik Rymphang.
U Commissioner & Secretary ka tnat DCA ka Srokar Jylla u Bah CV Diengdoh u la pyntip ba haduh 3 baje, ka jingwan poi ki nongthep Vote hapoh KHADC ka long 60% bad ha JHADC ka long 70%. U la ong ba ka ilekshon hapoh KHADC ka iaid beit iaid ryntih hynrei ka la don ka jingkulmar haki 4 tylli ki jaka thep Vote (Polling Station) jied MDC ha JHADC kiba hap hapoh ki constituency jong ka East Jaintia Hills.
“Katkum ki kyndon jong ka Rule 143 b, la shah ban pynlong ilekshon biang lada ioh kaiphod bad don ka jingshah pynjot ia ki kor thep Vote (EVM Machine) bad dei namar kane ka DCA ka pynbna ba haka step jong ka 22 tarik Rymphang kan don biang ka jingthep Vote ha ki 4 tylli ki Polling Station kiba hap hapoh ka JHADC” la ong u Bah CV Diengdoh.
Haba kylli halor ki sienjam ba la shim ban pynthikna ba kan nym don shuh ka jingkulmar, u Commissioner & Secretary ka tnat DCA u la ong ba ki bor District ka East Jaintia Hills naduh ka ophis Deputy Commissioner haduh ka ophis Superintendent of Police ki la shim khia ban pynjur ka jingpahara ha ka 22 tarik mynta u bnai ha ki 4 tylli ki jaka thep Vote.
“Ngi la phah shuh ki bor pahara, Additional Magistrate bad ki nongpyniaid thep Vote thymmai ban pynthikna ban shngaiñ ka jingthep Vote ha kine ki 4 tylli ki jaka thep Vote. Ngi kyntu ia ki paidbah ba kin mih shakhmat ban wan thep Vote khlem kano kano ka jingsheptieng” u la ong.
