LUCKNOW, OCT 5 (UNI):- Prime Minister Narendra Modi addressing at Azadi@75 New Urban India: Transforming Urban Landscape Conference-cum-Expo in Lucknow on Tuesday. UNI PHOTO-1U
New Delhi, Nailur 05: Ha ka sngi kyrpang jong ki nonghikai kaba rakhe ha kylleng ka ri, u Myntri Rangbah Duh, u Narendra Modi u la pynbna ia ka sienjam ba thymmai,ka PM SHRI Schools.
Kane ka dei ka skhim kaba thymmai kaba bei tyngka da ka Sorkar Pdeng ban kyntiew bad pynbha ia palat 14500 tylli ki skul ha kylleng ka ri da kaba pynkhlain ia ki skul kiba la don lypa napdeng kito kiba pyniaid da ka Sorkar Pdeng, ki Sorkar Jylla abd UT bad ki kynhun shnong.
Ki skul PM SHRI kin pyni ia baroh ki bynta ka National Education Policy 2020 bad kin long ki skul kiba ai nuksa ia kiwei kiwei ki skul kiba don hajan jong ki. Ka thong jong kine ki skul ka dei ban ai ia ka jinghikai kaba bha, ka jingkyntiew ia ka jingioh jingstad bad ruh ban pynmih ia ki khynnah skul kiba biang ha ki jingnang jingstad bad ki sap kiba iahap bad kane ka juk mynta.
Ka rukom ai jinghikai ha kine ki skul kan long kaba buh nongrim ha ka jingleh experiment, kaba pura, kaba iasoh, kaba pyndonkam da ki jinglehkai, kaba pynshlur ia ka jingbuhjingkylli ki khynnah, kaba peit bniah ia ka jingioh jingnang jingstad, kaba laitluid bad kaba sngewtynnad.
Ka jingpeit bniah kan long ruh ban pynthikna ka jingioh jingnang jingstad man u khynnah ha man ka klas. Ia ka jingjurip ia ka jingiaid shaphrang ki khynnah yn buh nongrim ha ka jingsngewthuh ia ki jinghikai bad ka jingpyndonkam ia kane ka jingsngewthuh ha ka jingim man ka sngi bad kane kan long ruh ha ka nongrim jong ka jinglah ki khynnah ban leh ia kane.
Kine ki skul kin don ki jingdon jingem katkum ka juk mynta kaba kynthup ia ki lab, ki smart classroom, ki library, ki tiar ialehkai, ki kamra saindur bad kiwei kiwei kiba long kiba pdiang ia baroh bad kiba baroh ki ioh lad ban pyndonkam.
Yn pynlong ruh ia kine kum ki skul kiba iada ia ka mariang bad kiba tyngkai ia ka um, ha kaba yn don ka jingpyndonkam biang ia ki niut bad ka jingpyndonkam ia ka bording ha ka rukom kaba kunai ia kane. Yn don ruh ka jinghikai shaphang ki kam organic ha kine ki skul.
Kine kin ialam lynti ha ki thain jong ki ha kaba iadei bad ka jingai ia ka jinghikai kaba bha bad kaba ryntih, kaba pdiang ia baroh bad kaba sngewtynnad, kaba pdiang ia kito kiba wan na ki longiing bapher bapher, kaba peit ia ki jingdonkam ban nang ia ki ktien bapher bapher, bad katkum ka jingstad kaba pher na uwei u khynnah sha uwei pat khnang ba kin long kiba don la ka bynta ha ka jingnang jingstad lajong katkum ka thong jong ka NEP 2020.
