Shillong, Iaiong 07:U Conrad K Sangma u ba dei u myntri rangbah ka jylla hynne ka sngi u la pynbna T.15 klur ban kyrshan iaka Seng Khasi kmie na ka bynta ban tei ia ka Indigenous Cultural Centre ha Mawkhar.
Ïa kane u Conrad u la pynbna hadien ba kut noh ka Shad Suk Mynsiem ba lai sngi lynter kaba la long ha Madan Weiking ba la pynlong daka Seng Khasi Kmie.
U Conrad haba kren halor ka jingdonkam ka seng khasi ia ka Indigenous Cultural Centre u la ong “Kumba ngi la ju pynpaw ngi donkam ban pynneh pynsah bad kyntiew ia la ki kolshor, ki riti dustur, kumta ngi donkam ban don ia ka Indigenous Cultural Centre jong ka Seng Khasi”
U Conrad K Sangma u la ong, ka Sorkar ka la mang T.15 klur na bynta ka Indigenous Cultural Centre ha Mawkhar bad ha u bnai Jymmang yn buh maw nongrim khnang ban ioh sdang noh ia katei ka Project.
U la ong, ka Indigenous Cultural Centre ha Mawkhar kan dei ka Project thymmai hynrei yn don ruh ki kam ban pynthymmai bad ïa kane ka Project tei da ka pynshong nongrim bha ha ka teknoloji katkum ka juk mynta.
Haba iadei ka Madan Weiking, u Conrad K Sangma u la ong “Nga don ïa ka jingsngew shimet jong nga ba ngi lah ban pynbha ne pynthymmai ia ka Madan. Nga sngew ba kane ka Madan ka don la ka jong ka jinglong kyrpang bad nga ïohi ki nongjongohkai pyrthei ruh ki tuid bha ha kane ka Madan namar kata nga sngew donkam ban pynheh ia ki jaka shong paidbah”
U Conrad K Sangma u la ong ba shen un sa ïakren bad ka Organizing Committee jong ka Seng Khasi Kmie ban iasyllok na ka bynta ban iatreilang khnang ban lah pynbha ia ki jingtei ha baroh kawei jong ka Madan Weiking”
Nalor kane u Myntri Rangbah u la ong ba ka jingkyrshan ka Sorkar Jylla kam kut tang ia ka Seng Khasi Kmie hynrei kan iai bteng ban kyrshan ïa baroh ki jaitbynriew kiba don hapdeng ka jingthrang ban pynneh pynsah bad kyntiew ia la ki kolshor bad riti dustur.
U Conrad K Sangma u la ong ba dang shen u la pynbna T.50 lakh tyngka ha ka thaiñ Karbi na ka bynta ka Culture Centre bad nalor kata u ka pynbna ruh ia ka jingiarap jong u sha ki jaitbynriew Rabha, Pooch bad ki Hajong.
