Shillong, Lber 03: Ka KSU Jowai Circle hynne ka sngi ka la leit ban pyndam noh shi syndon ia ka kyrteng shnong ba la thoh bakla ha ka Signboard jong ka NHAI ha Soomer lad Bypass Jowai WJHD kaba la thoh ‘KHALERIAT’.
Kum ban shu pynkynmaw ba kane kam dei ka sien ba nyngkong ba kum kine ki jingbakla ki la jia hynrei la jia bunsien wat haka shnong Khliehriat ruh ha kaba kawei ka bank ka la thoh khnang da ka Spelling jong ka hi kum ka jingpyrshang ban kylla kyrteng ia ki shnong ba don ha Ri Lum khasi bad Jaintia.
Hadien ba ki paidbah kila ujor sha ka seng halor kane ka jingbakla mar mar ka seng hapoh ka jingialam u Ewanmi Phawa President Jowai Circle ryngkat ka jingsynran lang ki dkhot ka la leit ban phah pyndam noh wut wut ia kane ka jingbakla ba la thoh ha katei ka Signboard.
Halor kane, ka seng kala phah shna ruh ia ka NHAI ba kan buh da kawei kaba biang ka spel daka iaka Shnong KHLIEHRIAT da kawei pat ka signboard ba thymmai bad la dawa ruh na ka ban pynbeit kloi ia kane hapoh shi bnai namar kane ka jingbakla kan wanrah ka jingduh ia ka burom ba khraw Jong ka Shnong Khliehriat.
Ka seng kala phah ruh iaka NHAI ban pynbeit ha baroh ki signboard, ki kot ki sla bad ki digital platform jong ka halor katei ka jingbakla.
Kaba lyngngoh ka long ba haba mynta ka sngi ki dkhot ka seng ki lah leit kynduh iaki ba official ka NHAI ka jubab ba ki ai ka long ” Ngi shu wan khrong khajna shane dep nangta ngi lah leit phai ngim tip ia kata ka jingbakla ne bym bakla”
Ka seng halor kane ka jingkren une u ophisar ka NHAI kala pynbitar bad shim ba kane ka jingleh dei kaba leh khnang.Ka seng ka kyntu iaka shnong Khliehriat khamtam ban ujot FIR iaka NHAI.
Ha kajuh ka por, ka seng ka maham ruh ia ki dukan, ki ophis, bad ia kiwei kiwei ba kin thoh shai ia ka kyrteng shnong da kaba beit bad lada lap ia kino kino kiba leh bakla yn sa pynshitom ia ki katkum ki kyndon ain.
