Shillong, Rymphang 02: Ka District Magistrate jong ka East Khasi Hills District kala pynjari ia ka kyndon 163 BNSS ka ain thymmai jong u snem 2023 ban khang ban thied dohkha na Bangladesh bad ban die ha jylla khlem don kino kino ki kot ki sla kiba biang.
Ia kane ka jingthied dohkha beain na Bangladesh la khang ia ki riew shimet ne ki kynhun hapoh upud u sam jong ka East Khasi Hills District, la pynjari ia kane ka hukum ka long ha dien bala ioh jingtip ba ki don ki briew kiba wan kit dohkha na Bangladesh na ki lynti iaid bapher bapher.
Kane ka jingwan rah ia ki dohkha ka long beain namar ka pynkhein ia ka ain jong ka tnad Customs, kaba dei ia ia dei ka thied na kawei ka ri sha kawei bad kiwei ki kyndon ain bai a dei bad ki mar bam, kane ka jingwan rah ia ki dohkha na kawei ka ri kan ktah ia ka koit ka khiah jong ki paidbah bad ia ki trai jylla kiba pynmih dohkha.
Lada don mano mano ka pynkhein ia kane ka hukum kin shah pynshitom hapoh ka kyndon 223 jong ka ain BNS, 2023 bad hapoh kiwei ki kyndon jong ka Customs Act, Foreigners Act, Passport Act bad kiwei kiwei.
