Shillong, Rymphang 12: U Deputy Commissioner jong ka East Jaintia Hills District u Manish Kumar, IAS, mynta ka sngi u la pynjari ia ka kyndon 163 jong ka BNSS ban khang ia ka jingpyniatur masi hapoh ka District.
Haba pynjari ia kane ka kyndon ain u DC u la ong bala ioh jingtip ba ha man don tamsa phit ka don ruh ka jingpyniatur masi bad kane ka long pyrshah ia ka Prevention of Cruelty to Animals Act, 1960 bad ka pynkhien ia ka rai jong ka Supreme Court kaba la khang pyrshah ia ka jingpyniatur masi ha u snem 2014.
Kane ka jingpynbna ban khang ia ka jingiatur masi ka long kum ka jingbteng ia ka rai kaba la pynmih ha ka 28/Iaiong/2025 ha kaba la khang ia ka jingpyniatur masi ba don ki Phit ne kino kino ki tamasa ha ki katto katne ki bynta jong ka District.
La maham ba lada don mano mano kiba pynkhein ia kane ka jingpynbna yn pynshitom hapoh ki kyndon ain kiba la don namar ka jingkyrkih ka por la ai ia kane ka rai ba kan trei kamnoh mardor haduh ban da pynbna da kumwei pat.
