Shillong, Nailar 26: Ka [24]7.ai, kawei na ki lad ai jingshakri lyngba ki kor ki bor bad kiba ïarap ia kiba thied, dang shen ka la shim ar tylli ki sienjam kiba dei ha ka jingai jingshakri sha ka imlang sahlang.
Ha ryngkat ka jingthrang ban ïatreilang lang ha ki kam shnong kam thaw ban shakri ïa ki riewpaidbah, ka Company ka la pynlong ka jingrakhe Independence Day ha Thomas Orphanage bad ka prokram synñiang snam. Kine ki sienjam ki pynphalang ia ki jingpyrshang ka [24]7.ai ban wanrah ka jingkylla ha ka jingim kiba dei hok ban ïoh ki jingïarap.
Kum shi bynta ha kaba shim ia kine ar tylli ki sienjam treikam, ki nongtrei (volunteers) na ka [24]7.ai, ki la leit jngoh īa ka Thomas Orphanage, ha kaba ki la pynlong ki kam pynbyrngia bad ki kam ban kyntiew ïa ka pule puthi na ka bynta ki khynnah khunswet.
Kine ki kam ki kynthup ïa ki jingïakren halor ka jingdonkam ban rakhe Independence Day, ki jingshad, ki jingrwai ha kaba baroh ki thew sha ka jingīatylli ha ka imlang sahlang bad ka jingieid la ka Ri.
Nalor kane, la sam ruh ki jingai sngewbha kiba don jingmut, kynthup ki sketchbook, ki tiar skul bad ki jingïalehkai. Kane ka prokram ka la wanrah ban pynkynmaw ha ka jingmut ki samla ia ka phang ban synñiang kylla.
Nalor kane, ka [24]7.ai ka la pynlong ïa ka prokram synñiang bad ai snam ha ki sngi sdang une u bnai. Ha kane ka prokram la sakhi ïa ka jingwan īa shim bynta bad synñiang da ki nongtrei kiba bun ngut.
Kane ka prokram ka pyni ïa ka jinglong skhem ka Company ban synñiang sha ka imlang sahlang na ka koit ka khiah. Da kaba pyrshang ïa kine ki kam, ka [24]7.ai ka bteng ban bat la ki kular ban ai ïarap kylliang sha ki nongshong shnong.
Haba kynthoh halor kane, ka Nina Nair, CHRO Global, [24]7.ai, ka la ong, “Ha ka [24]7.ai, ngi sngewthuh ba ka imlang sahlang ka long kaba donkam ha ka jingïaid sha khmat bad ka jingjop jong ngi.
Baroh ar tylli ki kam ha Shillong, ki ngam jylliew ha ka mynsiem jong ngi ban kyrshan ïa ka imlang sahlang kiba ngi don lang ka bynta. Kine ki sienjam treikam ki dei kiba don ka dor ban warah ka jingkylla ha ka rukom pyrkhat “.
Kine ki kam ki dei shi bynta ki sienjam na ka Corporate Social Responsibility (CSR) Volunteering Initiatives ka [24]7.ai. Nalor kane, ka College ka kyrshan īa ka Project Nirmalya, kaba thmu ban ai ki lad jingïarap ban wanrah ka khuid ka suba sha baroh ki skul sorkar ha ka Jylla.
Shuh shuh, ka [24]7.ai ka tyrwa scholarship sha ki khynnah pule kiba wan na ki longïing ba duna ka ïoh ka kot ba kin bteng jingpule bad ban lait na ka jingpep skul shiteng por. Kine ki sienjam ki kdew shai ia ki jingthmu ka Company ban kyntiew īa ka rukom im bad wanrah ka jingkiew ha ka imlang sahlang kaba ki shakri.
