Gangtok, Lber 13: Haba pynskhem biang ïa ka jingkut jingmut jong ka sorkar jylla ban ïakhun pyrshah ïa ka jingma jong ka jingdih drok, u Myntri Rangbah ka Sikkim, u Prem Singh Tamang (Golay), u la ban jur ba ka jylla ka bud ïa ka polisi ban ym ailad ia ki kam dih drok bad ka shim ïa ki sienjam kiba khlaiñ bad ïatreilang ban ïakhun pyrshah ïa ka jingkhaii drok beain bad ki jingdih pynbuaid.
U Myntri Rangbah u la kren ïa kine ki kyntien hynnin ka sngi ha ka jingïakren ha Gangtok bad ka kynhun ki nongthoh khubor na Meghalaya, kiba leit jngoh ia ka jylla Sikkim kum shi bynta ka press tour ba la pynlong da ka Press Information Bureau (PIB) Shillong.
U Tamang u la ong ba ka jingïakhun pyrshah ïa u drok kadei ka mat ba kongsan tam jong ka Sorkar Sikkim, namar ki jingdih pynbuaid ki buh jingeh kiba khraw ha ka imlang sahlang, ka koit ka khiah bad ka ioh ka kot, khamtam eh ïa ki samla.
Haba ban jur ïa ki sienjam ba la shim da ka sorkar jylla, u la ong ba ka Sikkim ka la pdiang ïa ka rukom treikam kaba bun rukom kaba kynthup ïa ka jingpyntreikam ia ka aiñ kaba pyrkhing, ka jingïashim bynta lang jong ki paidbah, ki campaign ai jinghikai bad ka jingkyrshan ban ai jingsumar ban weng ïa ka jingeh ha ka rukom kaba paka.
U la ong ba ki pulit bad ki bor jong ka ain ki la pynkhlain ia ka jingpeitngor bad pyntreikam ia ki sienjam pyrshah ia ki kam khaii drok beain. Lyngba ki jingtohkit kiba ryntih bad ka jingpynshitom kaba kham khlain, ka jylla ka la lah ban pynneh ia ka jingshah rai pynrem kaba bun ha ki kam runar kiba iadei bad u drok, kaba phah ia ka khubor kaba khlain pyrshah ia ka jingkhaii beain ia u drok.
Katkum ka jingiathuh u Myntri Rangbah ka Jylla, la la ban pynurlong ia ka jingrai pynrem kaba bun lyngba ka jingpynbha ia ki rukom tohkit, ka jingiatreilang kaba khlain hapdeng ki bor jong ka ain bad ka tnad bishar, bad ka jingpyntreikam pyrkhing ia ki kyndon hapoh ka Narcotic Drugs and Psychotropic Substances Act. Kine ki sienjam, u la ong, ki la iarap ban pynkhlain ia ka jingialeh pyrshah ia ki kam runar kiba iadei bad u drok.
U Tamang u la ban jur ruh ba la pynkup bor ïa ki Block Development Officer (BDO) ha ka jylla da ka bor majistor, kaba plie lad ïa ki ban shim mar mar ia ki sienjam bad pynkhlain ïa ka jingpyntreikam ha ki jaka nongkyndong. Kane, u la ong, ka la nang pynkhlaiñ shuh shuh ïa ka jinglah jong ka bor synshar ban pynthikna ba ki nongleh kam sniew kin shah pynngat ha ka aiñ bad shah rai pynrem katkum ka aiñ.
U Myntri Rangbah u la ban jur ba ban iada na ka jingdih drok ka donkam ia ka jingtreilang na ka sorkar, ki seng bhalang, ki longiing bad ki jaka pule.
U la ong ruh ba ka sorkar ka ïatreilang bad ki nongshong shnong, ki seng samla bad ki seng treimon sngewbha ban pynkhlain ïa ki lad jingïada bad ban pynthikna ïa ka jingïarap kaba kloi na ka bynta ki briew kiba don ha ka jingma na ka jingdih pynbuaid.
Haba ban jur ia ka jinglong ba kham iar ha ka thain halor kane ka mat, u Tamang u la kyntu ia baroh ki jylla jong ka thain shatei lammihngi jong ka ri ban iatreilang ha kaba weng ia ka jingeh jong ka jingkhaii bad jingdih drok. U la ong ba ki sienjam kiba ryntih bad ka jingiatreilang kaba khlain hapdeng ki jylla ba marjan ka long kaba donkam bha ban pynduh jait ia ka jingma na ka thain.
Da kaba ban jur ba ka jingïada ïa ki samla na u drok ka long kaba kongsan na ka bynta ka lawei jong ka imlang sahlang, u Myntri Rangbah u la kyntu ïa baroh ha ka imlang sahlang ban ïatreilang ha kaba tei ïa ka Sikkim kaba lait na u drok bad kaba koit ba khiah.
