Shillong, Lber 14: Ka tnad karkhana jong ka sorkar Meghalaya kala pynkup burom ia ki san ngut ki briew kiba la pyntbit kyrpang ia lade ha ki kam shna tiar da ka kti ha ka jingialang kaba la long ha ka 13/3/2026, kane ka khusnam “Handicraft Artisans 2024-25”.
Ki san ngut kiba la ioh ia ka jingthuh na ka sorkar ki long u bah Phras Syngkli na ka shnong Umkaduh, Ri-Bhoi District, u bah Gilford Pde naka shnong Chilliang Raij, West Jaintia Hills District, ka Mamsikha N Sangma na ka shnong Balsri A’ding Chitoktak, West Garo Hills District, ka Ensila D Shira na ka shnong Rongreng Chidekgre, Williamnagar, East Garo Hills District bad u bah Wanstep Thangkhiew na ka shnong Umsong, Ri Bhoi District.
Kum ka jingithuh ia ka jingtrei shitom jong ki ka tnad karkhana ka sorkar kala ai ia ka jingiarap pisa kaba mar T.50000/- tyngka bad ka syrnot, ia ka khusnam la sam da u Director ka tnad karkhana u bah F. Sutnga ha ka jingiadon lang ki heh katei ka tnad sorkar.
Ha ka jingkren u Director u la ong ba kane ka jingai khusnam ka long kum ka jingburom ia ka jingtrei shitom jong ki bad kaei kaba ki leh ka long ba kila shna ia ki tiar kiba dei na kane ka jylla bad ka tnad karkhana kan ai jingkyrshan ia ki da ka bai seng ba kin lah ban hikai ia kiwei ruh.
