Shillong, kyllla lyngkot 04: Ha ka 30 tarik u bnai ba la dep, u Rupang u lah pynkup burom ia lai ngut ki nongniah kali kita ki long u bah Robertson Nengnong, na ka Pynursla Shillong Tourist Maxi Owners Association, U bah Kenson Marbaniang na ka Pynursla Shillong Indica Tourist Taxi Owners and Drivers Association bad U bah Manbha Sohkhlet, na ka All Local and Tourist Taxi Association, Pynursla.
Ha kane ka jingpynkupburom , la don lang u bah N Khongkhlad uba dei u Secretary jong ka Covid 19 Team na bynta ka Border Trade Riwar Mihngi, nangta u Sirdar ka Elaka Nongjri , u Bah Napoleon Siej.
Ha ka jingpynkupburom , u bah N khongkhlad u la ai khublei shi katdei ia ki drivers’ association bad u la ong ba ki dribar ki dei kiba don ka kam kaba khraw, kata ki long ki dei kiba bat ia ka mynsiem jong kawei pa kawei ka longing, khamtam haba dei bad kane ka thain, namar u la ong ba kiba bun na ka thain Pynursla hi, ki dang ia shong kali kamai.
Na ka liang ka jong u Bah Khongkhlad, u la iai ban ba lada don kino kino ki jingeh haba iadei bad ki nongniah truck u la kyrpad ban pyntip lem sha ka truck Association khnang ban lah ban pynbeit iaki jingduna bad ki jingdkoh. U la ai khublei shikatdei eh iaka JAC kaba la lah ban pynsngewthuh jingmut ia ki association jong ki kali kamai bapher, kiba don ha kane ka thain.
Naka liang u Sirdar Nongjri, u la kren shaphang kata ka jingmut jong ka jingpynkupburom, ha kaba u ong ba uno uno uba trei shitom u don ka jingkhymih lynti bad kane kam thew tang iaka pisa lane kata kaba ai jakpoh, hynrei ia kum kane ka jingpynkupburom. U la ong shaphang ka jingkordor jong ka kam draibar, namar lada ki draibar kim don ka jingkit khlieh kam don ka jingsngew suk sngew shngain, hynrei lada ki draibar ki don ka jingkit khlieh ka don ka jingsngew suk sngew shngain wat ban thiah ha ka kali ba ki niah ruh kam don kano kano ka jingsngewrit mynsiem te ka long kaba donkam shi katdei eh ban ai burom ia ki dribar. U la kyrpad ia ki draibar ba kin long kiba iaishah namar ki passenger ki don la ka jong ka jong ka jinglong ka jong ki. U la iai ban da kaba burom markylliang haba ia kamai lang bad ban burom iaka kali kaba ai jakpoh, da ka jingkhuid jingsuba.
La pyniaid ia ka jingialang, da U bah Diamondstone Lyngdoh, uba dei U President ka Joint Action Committee jong ki seng ki nongniah kali bapher ha ka thain Pynursla, ha kaba la don lang U bah RM Shabong, Editor bad u trai jong U Rupang.com.Kane ka dei ka sien, kaba lai jong ka jingsam khusnam jong U Rupang.com ia ki nongniah kali jong katei ka thain.
