Shillong, Naiweng 08: Ka la bam por tang kumba shi kynta ia ka kynhun ialehkai ka Jammu & Kasmir ban lah ha kaban pynliem noh ia ka Meghalaya da 7 wiket ha ka jingiakhun jong ka Ranji Trophy Elite Group A ba la long ha madan ka MCA, ha Polo.
Haba wan ban sdang na ka 16 ron hadien ba la hap noh shi wiket, ka kynhun ialehkai ka J&K ka la duh noh satang ar wiket ha ki kti jong u Akash Choudhury.
Pynban wat lada ka kynhun ialehkai ka Meghalaya kan mad ia kane ka nam rem kaba saw sien lynter ka jong ka ha kane ka kyrdan iakhun jong ka Ranji Trophy mynta ka samoi, pynban lada phaidien bha sha kane ka jingiakhun kba dang shu dep, mihpaw ki dak ki shin jong ka jingsdang ban kiew ka kynhun, kaba h kane ka samoi ym dei ban klet ba ka hap ba kan mih madan ban iakhun pyrshah ia ki jylla ialehkai kiba la paw bad tbit bha ha ka ri.
Ban kyrtiang dien biang sha kane ka jingiakhun, ka Meghalaya hadien ba k la shah rem noh ha ka jingiakynting pisa, (toss), ka la lah ba kan kamai 73 ron, kaba jia long ha ka step kaba ka mdan ryngkat bad ka suin bneng kam ailad ia ki batsman ki jong ka ban lah ban kamai kham bun ia ki ron.
Haba wan ban bol pat, ki rang ka Meghalaya ki la lah ban tehlakam ia ki batsman ka J&K tang hapoh ka 200 ron katta 194. Ha ka pali wan tied kaba ar (second innings), ki batsman ka Meghalaya ki la lah ban kamai haduh 195 ron.
Haba phai sha ki bowler, u Aaryan Borah ba dei u left arm spinner u la lah ban ioh khur 5 wiket naka bynta 42 ron, bad na ka liang ki batsman u Arpit Bhatewara u la lah ban kamai 74 ron ha ka pali wan tied kaba ar.
Da kane ka resol, ka kynhun ialehkai ka jylla kan khreh ban mih pat na la iing ban hiar sha Vadodara ha kaba kin aireng pyrshah ia ka Baroda kaban sdang naduh k 13 tarik mynta u bnai.
