Shillong, Kyllalyngkot 03: U Akash Kumar Choudhury u la lah ban khur 5 wiket katba u Lerry Sangma pat u la lah ban kamai ia ka half century bad kane ka la biang pura ia ka Meghalaya ba kan lah ba kan pynliem ia ka Arunalchal Pradesh da 6 wiket haka lympung ialehkai jong ka Vijay Hazare Trophy 2025-26 plate group ba la long ha Ranchi myn ha ka 31 tarik u bnai Nohoprah ba la leit.
Shwa ia kane, ka Meghalaya ka la lah ba kan pynliem ia ka Mizoram ha ka jingiakhun ba nyngkong kaba long shi sngi shwa ka jinglehkmen ia ka Khristmas, hadien kane, ka la shah liem pat ha ka Nagaland bad ha ka Bihar ha ka jingiakhun ba la long ha ka 26 bad ha ka 29 tarik u Nohprah, bad da kane ka jingjop ia ka Arunachal, ka la buh biang ia ka Meghalaya ha ka thong ba kan iaknieh ban jam sha ka phainal.
Haba phai sha kane ka jingiakhun, ka Arunachal, hadien ba ka la jop ia ka jingkynting pisa (toss) ka la kam trai ba kan tied nyngkong, hynrei ka la lap ba hap noh baroh ki wiket ki jong ka, hadien ba ka la lah ba kan kamai tang 189 ron na ki 44.2 ober.
Haba la dei ka pali ban wan beh ia ka thong, ka Meghalaya kam shim la pynlehnohei ia la ka kabu ksiar ha kaba ka la lah ba kan kynjoh ia ka ha ka 23.1 ober bad ioh ia ka run rate kaba 8.33.
Na ka liang u Techi Doria ba dei artad u kapten, u kylla long u namtam na bynta ka Arunachal hadien ba u la lam khmat ia ka kynhun ban kamai ia ka spah ron (century) 106 ron.
Dei ha kane ka khep, ba u Akash u la lam khmat ia ka kynhun ki nong kawang bol ka Meghalaya ban khur ia ki 5 tylli ki wiket na bynta 26 ron, kaba shwa ia kane, u la khur ruh 6 wiket na bynta 44 ron ha ka jingiakhun pyrshah iaka Mizoram.
Kiwei pat ki bowler ka Meghalaya kiba la ioh ban khur lem ia la ki wiket ki long u Riboklang Hynniewta (1/20) bad Anish Charak (1/35).
Haba wan ban beh ia kane ka thong u Kush Agarwal (22 ron na ki 37 balls) bad Arpit Bhatewara (36 ron na ki 26) ki la seng ia ka nongrim kaba skhem ia ka la kynhun bad ia ki ron kiba sah pat la lah ban kamai pat ia ki lyngba ka jingia kamai ron paralok kaba long hadpeng u Jaskirat Singh Sachdeva (28 not out) bad Lerry (51 not out), kiba la seng ia ka nongrim kamai ron kaba 78.
Ha kaba kut jong kane ka jingiakhun u Akash u la ioh ban rah ia ka khusnam Player of the Match. Da kane ka jingjop, ka Meghalaya ka don ha ka kyrdan kaba saw hadien ba ka la khur 8 point bad ka jingiakhun kaban wan ia ka kan long pyrshah ia ka Manipur (12 point).
