Shillong, Nailar 04: Ki Nongialam ka seng Congress hynne ka sngi ki la pynlong jingialang ban pynrem ia ka jingshah kem ki ar ngut ki riewniam ka kynhun balang kothalik, ka ba la jia ha ka jylla Chhattisgarh ha Don Bosco Square Shillong ka seng Congress ka la kynnoh ba kane ka jingleh ka dei ka jingiuhroit ia ki riat paid da ka Sorkar ba lamkhmat da ka BJP
Haba kren ha kane ka sngi na ka liang u Samla Banphira Basaiawmoit u la ther da kaba tyngeh ia ka sorkar BJP ia ka jinglehmon ban pyntroin bad pyntieng ia ki rit paid ha kane ka ri jong ngi. U la ong ba hangne ha Meghalaya ka jingmane Blei ka long kaba laitluid wat lada kiba synshar ha khlieh duh ki isih.
U la ong ba kane ka jingialang kam dei ban ialum ban pynshongshit ne ban pyn-iaphiah para jaitbynriew hynrei ka dei na ka daw ban ia trei lang shi kynhun ban ialeh. Ka jingialeh jong ka congress kam dei ban shah shiliang hynrei ban ailad ban ia burom markylliang bad lada don kano kano ka jingshah banbeiñ ka sur jong ka congress kan sawa jam.
Na ka liang u Secretary ka Meghalaya Pradesh Congress Committee u bah Manuel Badwar haba kren ha kane ka jingialang ba lyngkot u la ong ba kam don ka por ba u shah ha ki bynta jong ka Ri ba ki Hindu kin long kiba ieh bad peit poh, ki Hindu ki dei kiba pynlong ia kata ka jingsngew kawei.
Ka Politic ka la rung ban peit ba kan don ka jingiapait ia pra, ka long kaei kaei kaba sngewsih ban iohi ia kane ha ka jaka ban kren bad kin wan rah ia ki kam pynroi ne ban pyniatylli. Ki sdang da kabe ka jingpynpait pynpra khnang ba kin lah ban ioh ia ka jingmyntoi ha ka por ilekshon, kane ka la iaid bynta la bun bun snem. U la ong.
U samla Banphira u la bynrap da kaba ong ba ki paralok Hindu kiba sah ha Meghalaya ki im ha ka jingsuk jingsain hynrei ha kiwei ki jylla ki sdang da kine ki kam ban wanrah ia ka jingpyntieng pynsmiej ia ki rit paid. Ka jingmih ban rah placard jong ka congress kam dei tang bad ka jingjia kaba dang jia shen hynrei ka dei kaba la ju jia na ka por sha ka por bad ha shuwa ban don ka ilekshon kum kine ki ju mih ban ioh jingmyntoi. Hangne ha Meghalaya wat la phi pynlong ia ki jingiaid paidbah ne ki Yatra kam don kano kano ka jingkhanglad namar ki thrang ban don kata ka jingiatylli.
