Shillong, Naitung 30: Ka BSNL dang shen ka la pynlong ia ka Hindi Workshop jong ka Official Language Implementation Committee ha Shillong, Meghalaya.
U Deputy Director, ka Official Language Implementation Committee, Tnat Kam Pohiing jong ka Sorkar Pdeng, Guwahati u Badari Yadav, uba long ruh uwei na ki symbud kongsan na ka bynta kane ka workshop, u la ong ba kane ka prokram ka don ka bynta kaba khraw ban ai jinghikai khnang ban kyntiew ia ka jingpyndonkam ia ka ktien Hindi ha ki kam ai jingtip ba man ka sngi ha ki ophis.
U Yadav u la pyniaid ia ki jingai jinghikai ha kane ka prokram kaba shi sngi kaba la long ha ka 26 tarik u Naitung halor ka ‘Jingdonkam jong ka Hindi, ‘Ki jingeh bad ki jingpynbeit haba treikam ha ka ktien Hindi’ ‘Ka jingpynkylla ktien sha ka Hindi’,.
Ki kam Unicode kiba iahap ha ki ktien ka India na ka bynta ki kor computer bad ki mobile, ka jingkyntiew jingtip online ia ki kaiphod man ka lai bnai bad ki Official Language Rules ha ryngkat kiwei kiwei ki kam kiba iadei bad ka ktien Hindi.
U Chief General Manager, BSNL, NE-1 Circle, Shillong u K.S. Madanpur u la kren shaphang ka jingkiew bad ka jingiar jong ki jingthoh ha ka ktien Hindi ha kylleng ka pyrthei bad ka jingpyndonkam ia ka ktien Hindi ha ki Circle Headquarter bad kiwei kiwei ki ophis hapoh jong kane.
Palat 50 ngut ki nongtrei BSNL kiba kham heh kyrdan ki la iashim bynta ha kane ka prokram bad ki don ruh kito kiba la iashim bynta lyngba ka lad online. GM (HR), u Shivendra Nath, PGM(CM), ka D.Giri, Sr.GM(CFA & EB), ka Namrata Tiwari ki la long ki symbud kongsan. U AGM(HR & Admin), u P.M. Swain u la pyniaid ia kane ka workshop.
