Shillong, Jylliew 21: Ha ka jingrah shakhmat ia ka phang jong ka International Day of Yoga mynta u snem kaba long ‘Yoga ialade bad ia ka imlang shalang’ hapoh ka jingialam jong u Mynri Rangbah Duh Narendra Modi, ka Central Bureau of Communication (CBC), Shillong bad PM SHRI Kendriya Vidyalaya Happy Valley mynta ka sngi ka la rakhe ia ka International Day of Yoga ha kane ka skul lyngba ka jingleh ia ka Common Yoga Protocol.
Palat 1000 ngut ki khynnah kiba pule ha kane ka skul ki la iashim bynta ha kane ka jingrakhe kaba la sdang ha ka por 8 baje mynstep. Ki khynnah na baroh ki klas jong kane ka skul ki la iashim bynta lang ha ka jingleh ia ka Common Yoga Protocol ba la ialam da ka nonghikai Yoga, Usha Ghosh kaba dei na ka Meghalaya Yoga Samiti.
U Principal ka KV Happy Valley, D B Singh, ha ka jingai jingkren ia ki khynnah u la ong ba ka yoga ka dei ka lad kaba biang tam ban ioh ia ka jingkoit jingkhiah ha ka met bad ki jingmut jingpyrkhat bad u la ong ruh ba la pdiang ha kylleng ka pyrthei ba kane ka dei ka lad kaba biang tam ban ioh ia ka jingbha ha ka jingim.
Ka thong jong ngi ka dei ban pynshlur ia ki khynnah ba kin leh yoga man ka por. Da kaba kyntu ia khynnah ba kin leh Yoga man ka sngi, u Singh u la ong ba ka Yoga ka iarap ban pyniasoh ia ka met bad ka jingmut jingpyrkhat bad ka pynkhlain shuh shuh ia ka bor pyrkhat.
U la iaroh ia ka sienjam jong ka CBC Shillong ban wan iatrei lang bad ka PM Shri KV Happy Valley, Shillong ban pynlong ia kane ka prokram ha kane ka sngi ba kyrpang.
U Wing Commander Sreeprakash J., PRO Defence Meghalaya u la wan iashim bynta ha kane ka prokram bad u la ai mynsiem ia ki khynnah da ki kyntien jong u. Naduh ki por hyndai, ka Yoga ka la ai ia ka jingbha sha ki briew bad 10 snem ba la leit, ka la kylla sha ka jingiakhih ha baroh kawei ka pyrthei, u la ong.
U la kyntu ia baroh ba kin pdiang ia ka jingleh Yoga man ka sngi na ka bynta ka jingbha. U la ong ba ka jingpynleit jingmut ka lah ban kham khlain haba leh ia ki Yoga asana bapher bapher.
Kane ka jinglong jingman jong ki jingmut jingpyrkhat ka wanrah ia ki jingmyntoi ha kaba ka duna ka jingthait bad haba lah ruh ban pynleit jingmut ha ki kam.
Ha ka jingban jur ia ka jingiadei kaba jan bad ka deiriti jong ka India, u la ai jingsngewnguh ia u Myntri Rangbah Duh, Narendra Modi uba la kyntiew ia ka yoga ha ka pyrthei naduh ba u la wan ha ka bor.
U Media & Communication Officer, PIB Shillong, Gopajit Das u la ong ba la pynlong ia ki prokram bapher bapher ha ka International Day of Yoga khnang ban ai bynta lang ia baroh bad ruh ban rah shakhmat ia ka khubor jong kane ka jingiakhih paidbah. Ka Central Bureau of Commission ka dang pynlong ruh ia ki prokram ha kylleng ka ri ban kyntiew ia ka Yoga.
U la ong ba ka Yoga ka dei ban long shi bynta jong ka jingim jong ngi kaba koit ba khiah bad kaba iaineh. Ha kine ki 10 snem ba la dep, ka jingrakhe ia ka Yoga ha kylleng ka pyrthei ha kane ka sngi ka la pynsaphriang ia ka khubor ban leh Yoga na ka bynta ka koit ka khiah ha ka met ka phad bad ha ka jingmut jingpyrkhat bad ruh na ka bynta ka jingim kaba iaineh, u la ong.
La pynlong ia ki jingiakop Inter-House quiz, dro jingdro, bad jingiakop iatai nia na ka bynta ki khynnah pule ha kane ka skul ha kane ka jingrakhe ba ar sngi.
La don ruh ki bynta ba kyrpang ha kaba ki khynnah ki la ai jingkren shaphang ka Common Yoga Protocol bad ki jingmyntoi ba ioh na ka jingleh ia ki Asana bapher bapher.
Ia kine ki jingiakhun la pyniaid da u Vice Principal jong ka KVK, K Ramesh, nonghikai Physical Education, Ganga Prasad Chetri, nonghikai dro jingdro, Chanchal Srivastava bad ia ka jingiakop Quiz la pyniaid da u Ved Prakash. Yn sam ia ki khusnam sha ki nongjop jong kine ki jingiakhun da ka Central Bureau of Communication.
Ka CBC Field Office ha Nongstoin ruh ka la rakhe ia ka International Yoga Day, 2024 ha Jawahar Navodaya Vidyalaya, Nongstoin, West Khasi Hills Distrik. Ka Riba Jana ka la pyni ia ka Surya Namaskar. Ka Archana Upadhyay, nonghikai PT jong ka JNV Nongstoin ka la ialam ia kane ka jingleh yoga bad ki khynnah kiba la iashim bynta shitrhem ha kane ka jingrakhe.
U Sherief PM, Principal In Charge, JNV Nongstoin u la wan iashim bynta lang ha kane ka sngi kum u kongsan. Ka jingphai khmat jong kane ka prokram ka dei ban pynkynmaw ia ki paidbah shaphang ki jingmyntoi kiba wan na ka jingleh Yoga man ka sngi. La pynlong ruh ia ki jingiakop rwai jingiakop shad bad la sam ia ki khusnam sha ki nongjop.
