Shillong, Lber 02: Ka Dorbar Kur Shylla ka la long ha ka sngisaitjain 1tarik Lber, 2025 ha Mawkynrew ha kaba da ki spah ngut ki parakur parajait na kylleng ka Ri Khasi Jaintia ki la ia poi ban shim bynta ha ka Dorbar bah ba shisien shisnem.
U kongsan ha kane ka Dorbar Bah u dei u Bah Wailadmiki Shylla, MLA Jowai ha ka ba ia don lang ki kynrem lyndan ba kynthup ia u Bah R L Kharpran, Bah Rapionglang Blah, Bah Raphael Warjri bad Bah Hos Kharmuti, ki dkhot rangbahkur na ka Synjuk Ki Rangbah Kur Ka Bri U Hynñiewtrep.
La pyniaid ia ka Dorbar da u Bah Pyrkhat Shylla, Khlieh Rangbah jong ka Sein Kur Shylla bad ki ba la kren ki kynthup ruh ia u Saiñpyniar ka Seiñ Kur Shylla u ba la ai ka kaiphot bad byllai ki jingtip shaphang ka Kur Shylla bad kiwei kiwei ki kur ki ba dang iadei thana ba kynthup ia ki San Syngkhong.
Kiba dei na ka kur Pde, Pariat, Blah, Sung, Thangkhiew, Syih, Dong, Yndoh Subi ne Lyngdoh Subi, Khapiah, Iadai, Rabon, Sajem, Ngatam, Tangliang, Chen, Thubru, Suliang, Suna, Langi, Joh, Ladia, Doom, Lamar, bad kiwei kiwei ki ba ym pat thikna ia ka jingiadei thana kur.
Ha ka jingkren jong u kongsan, Bah Wailadmiki Shylla u la kren mardor ba ka long ka ba donkam ban pynneh pynsah ia ka Seiñ Kur da ka ba pyrto ia ki rangbahkur Shylla ki ba la synñiang ha ka imlang sahlang.
U kongsan u maham ruh ba manla ki rangbah ki don ka jingkitkhlieh ha ka ban ri burom ia la ka longrynñieng kum ki rangbah da ka ba kdew ba ka shimpor ban tei pynskhem ia ka nam ka burom bad tang shikhyllipmat ka lah ban jah burom lada bakla ha kano kano ka bynta.
Kum shibynta ban pynshlur bad ai mynsiem ia ki samla bad rangbah jong ka kur la ai khusnam sha ki samla ki ba la jop kyrdan ha ki jingpule bapher bapher ha la ki kyrdan pule bad uwei na ki ba khraw nam khraw burom ban ioh khusnam dei u Dr Jacob Shylla u ba la jop ia ka kyrdan Ph D ha ka English, u ba la ai ka jingkren ka ba kynsai haduh katta katta na ka bynta ban tei ia ka imlang sahlang.
Kiwei kiwei ki ba la ai jingkren ka long na u Bah R L Kharpran, Khlieh Rangbah ka Synjuk Ki Rangbahkur ka Bri U Hynñiewtrep, u Bah Pyrkhat Shylla, Khlieh Rangbah ka Seiñ Kur Shylla bad la ai jingkren khublei pynwai da I Kong Joplin Shylla.
Ha kane ka dorbar bah la jied ruh ia ki Nongkitkam thymmai ki ba kynthup ia u Bah Pyrkhat Shylla ba la neh kum u Khlieh Rangbah, u Bah Almeki Shylla ruh la iaineh kum u Saiñpyniar Lumlang.
Bah Joshlin Shylla u Batsaipan, ki nongkynpham ba kynthup ia u Bah Kyrmen Shylla, Wailadmiki Shylla, Kong Santa Maria Shylla, Bah Wilford Shylla bad kiwei kiwei ki dkhot nongkitkam jong ka Seiñ Kur Shylla, Seng Kmie. La pynskhem ia ki nongkitkam thymmai da u Bah Rapiong Lang Blah bad la pynphuih pynphieng ruh ia ka Dorbar Kur da ki jingrwai jingshad na ki samla na ki shnat kylleng ka Ri Khasi Jaintia.
